މިޔަންމާގެ މެދުތެރެއަށް ބާރުގަދަ ބިންހެލުމެއް އައިސް، އެ ޤައުމާއި އަވަށްޓެރި ސަރަޙައްދުތަކަށް ބޮޑެތި ލޮޅުންތަކެއް އައިސްފައިވާ ކަމަށް ބޭރުގެ މީޑިއާ ރިޕޯޓްތައް ބުނެފިއެވެ.

ޔުނައިޓެޑް ސްޓޭޓްސް ޖިއޮލޮޖިކަލް ސަރވޭ (ޔޫއެސްޖީއެސް) އިން ބުނާ ގޮތުގައި މި ބިންހެލުން އައީ މިއަދު މެންދުރު ގާތްގަނޑަކަށް 12:50 ގައެވެ. މި ބިންހެލުމުގެ ބާރު މިނުގައި ގާތްގަނޑަކަށް 7.7 ރިކްޓަރ ހުރިއެވެ. އަދި މި ބިންހެލުން ފެށުނީ ބިމުގެ އަޑިން 10 ކިލޯމީޓަރު ފުންމިނުން ކަމުން އޭގެ އަސަރު ވަރަށް ބޮޑަށް ކޮށްފައިވާ ކަމަށ ބުނެފައިވެއެވެ. 

މި ބިންހެލުމުގެ އަސަރު ކުރި ސަރަޙައްދުތަކުގެ ތެރޭގައި ތައިލެންޑުގެ ވެރިރަށް ބެންކޮކާއި، އިންޑިއާގެ ދިއްލީ-އެންސީއާރު ސަރަޙައްދު ހިމެނެއެވެ. އަދި މިހާތަނަށް އެއްވެސް މަރެއް ނުވަތަ ބޮޑު ގެއްލުމެއް ރިޕޯޓުކޮށްފައި ނުވިނަމަވެސް، ކަމާބެހޭ ފަރާތްތަކުން ދަނީ ހާލަތު ވަޒަންކުރަމުންނެވެ.

މިޔަންމާ އާއި އަވަށްޓެރި ސަރަޙައްދުތަކުގައި މި ބިންހެލުމުގެ ސަބަބުން ބޮޑު ބިރުވެރިކަމެއް އުފެދުނެވެ. އެގޮތުން މަންޑަލޭ އާއި ބެންކޮކް ފަދަ ސިޓީތަކުގައި ހުރި އިމާރާތްތަކަށް ބޮޑެތި ލޮޅުން އެރިއެވެ. އަދި ގިނަ ރައްޔިތުން ބިރުން މަގުމައްޗަށް ނުކުތެވެ.

ބެންކޮކްގައި މި ބިންހެލުމުގެ އަސަރު އެހާ ބޮޑަށް ކުރުމާ ގުޅިގެން، އުސް އިމާރާތްތަކުގައި ތިބި ގިނަ ބަޔަކު ވަނީ އެ އިމާރާތްތަކުން ނުކުމެފައެވެ.

"އެއީ ވަރަށް ބިރުވެރި ތަޖުރިބާއެއް. އަޅުގަނޑުމެންނަށް އިހުސާސްވީ ގިނަ ސިކުންތުތަކެއްގެ ވަންދެން ބިން ހެލޭ ކަމަށް،" ބެންކޮކްގެ ރައްޔިތެއް ބުންޏެވެ.

މިޔަންމާ އާއި ތައިލެންޑުގެ އިސް ފަރާތްތަކުން މިހާރު ދަނީ ކުއްލި ހާލަތުގެ އެހީތެރިކަން ފޯރުކޮށްދިނުމަށް މަސައްކަތްކުރަމުންނެވެ. އަދި އިތުރު ނުރައްކަލެއް ކުރިމަތިވެދާނެ ކަމަށް ބަލައި، އާފްޓަރޝޮކްތަކަށް ވެސް ސަމާލުކަން ދެމުންނެވެ.