ޅ. ނައިފަރުގެ ޤުރުއާން ލާނިންގ ސެންޓަރ ތަރައްޤީކުރުމަށް ބޭނުންވާ ވަސީލަތްތައް ހޯދުމަށް އިސްލާމިކް މިނިސްޓްރީގެ އިސްލާމީ ވަޤުފު ފަންޑުން އެހީ ފޯރުކޮށްދިނިމަށް ނިންމައިފިއެވެ.
މިކަން ހާމަ ކުރައްވައި އިސްލާމިކް މިނިސްޓަރ ޑރ މުހައްމަދު ޝަހީމް ޢަލީ ސަޢީދު ވިދާޅުވީ، ގިނަ ކުދިންތަކެއް ޤުރުއާން ހިތުދަސްކުރި، ޅ. ނައިފަރުގެ އެ ސެންޓަރ ތަރައްޤީކުރުމަށް ބޭނުންވާ ވަސީލަތްތައް ހޯދުމަށް އެދިފައިވާތީ އެކަމަށް މިނިސްޓްރީގެ އިސްލާމީ ވަޤުފު ފަންޑުން ހޭދަކުރަން ނިންމާފައިވާ ކަމަށެވެ.
ނައިފަރުގެ މި ސެންޓަރަކީ ގިނަ އަދަދެއްގެ ހާފިޒުންތަކެއް އުފެއްދުމުގެ ކާމިޔާބު މަސައްކަތެއް ކުރަމުން އަންނަ ޝައިހް/ހާފިޒް އަހުމަދު ނާޒިލް ހިންގަމުން އަންނަ ސެންޓަރެކެވެ.
މި ސެންޓަރު ތަރައްގީކުރަން ފަންޑު ހޯދަން ހުޅުވާލައި މިދިޔަ އާދިއްތަ ދުވަހު ޝެއިހް ނާޒިލް އިންސްޓިޓިއުޓުން ކޮށްފައިވާ ޕޯސްޓެއްގައި ބުނެފައިވަނީ ނައިފަރުގައި ގުރުއާން ހިތުދަސްކުރަން ބޭނުންވެފައިވާ އެތައް ކުދިންނެއް ތިބި ކަމަށާ އެހެން ނަމަވެސް އެ ސެންޓަރު ހިންގަމުންދާ އިމާރާތުގައި ޖާގައިގެ ދަތިކަން އޮތް ކަމަށެވެ.
އަދި ވިއްސާރަ މޫސުމެއްގައި ނަމަ އެ އިމާރާތަށް ފެންފޭބުން ފަދަ ކަންކަން ކުރިމަތިވާއިރު، އިމާރާތުގެ ސީލިންްގުގައި މީދާ އާލާވެ، ފާރުތަކުގައި ރެނދުލައި، އިމާރާތް ބާވެ ވީރާނާވަމުންދާކަން ފާހަގަކޮށްފައިވެއެވެ.
ނާޒިލްގެ ޤުރުއާން ކިލާހުން ދަނީ މިވަގުތު ރާއްޖޭގައި ހިންގޭ އެންމެ ކާމިޔާބު ހިފްޒު ޕްރަގްރާމް ހިންގަމުންނެވެ. ކުރު މުއްދަތެއްގެ ތެރޭގައި ނައިފަރުގެ ހަތަރު ދަރިވަރަކު ވަނީ ގުރުއާން ހިތުން ދަސްކޮށް ހާފިޒު ކަމުގެ ސަނަދު ހާސިލު ކޮށްފަ އެވެ.
އަދި މި އަހަރު ނިމުމުގެ ކުރީން އިތުުރު 8 ދަރިވަރަކު ގުރުއާން ހިތުން ދަސްކޮށް ހާފިޒު ކަމުގެ ސަނަދު ހާސިލު ކުރާނެ ކަމަށް ޝެއިޚް މައުލޫމާތު ދެއްވައެވެ.
Advertisement
This content is created and paid for by advertisers and does not involve Voice Journalists
