ޢީދުގެ އުފާ ފާޅުކުރަންވީ ފަޤީރުންނަށާއި މިސްކީނުންނަށް ހެޔޮ ފޯރުކޮށްދީ، ޢީދުގެ އުފަލުގައި އެ މީހުން ވެސް ބައިވެރިކޮށްގެން ކަމަށް މިއަދުގެ ޢީދު ޚުތުބާގައި ބުނެފިއެވެ.

މި ފިޠުރު ޢީދު ދުވަހުގެ ޢީދު ޚުތުބާގައި ބުނިގޮތުގައި، އިސްލާމީ ޢީދުތަކަކީ އޭގެ އުފަލުގައި އެންމެން ބައިވެރިކުރުވަން ޖެހޭ އިޙްތިފާލުތަކެކެވެ. އަދި ތަނަވަސްކަމުގެ އަހުލުވެރިން، އެ ދުވަހުގައި އުފާފާޅުކުރަންވީ ފަޤީރުންނަށާއި މިސްކީނުންނަށް ހެޔޮ ފޯރުކޮށްދީ، ޢީދުގެ އުފަލުގައި އެ މީހުން ވެސް ބައިވެރިކޮށްގެންނެވެ.

"ފިޠުރު ޢީދު ދުވަހު، ޢީދު ނަމާދުގެ ކުރިން ފިޠުރު ޒަކާތް ނެރުމަށް އަންގަވައިފައިވަނީ، އޭގެ ސަބަބުން ފަޤީރުންނަށް ޢީދުގެ އުފަލުގައި ބައިވެރިވުމުގެ ތަނަވަސްކަން ލިބޭނެތީއެވެ،" ޢީދު ޚުތުބާގައި ބުންޏެވެ.

މީގެ އިތުރުން، ޢީދު ދުވަހު ގާތްތިމާގެ މީހުންނަށް ޒިޔާރަތްކޮށް ހެޔޮފޯރުވުމަށާއި، ޢީދުގެ ތަހުނިޔާއާއި ހެޔޮ އެދުންތައް ފޮނުވުމަށް ޚުތުބާގައި ނަޞޭހަތްތެރި ވިއެވެ. އަދި ރަޙިމުގެ ގުޅުން ދެމެހެއްޓުމުގެ މުހިންމުކަން ފާހަގަކޮށްފައިވެއެވެ.

"މިއަދު އަހަރެމެން ޢީދުގެ އުފާފާޅުކުރަމުންދާ އިރު ދުނިޔޭގެ އެކި ކަންކޮޅުތަކުގައި ޙާލުގައި ޖެހިފައިވާ މުސްލިމު އަޚުންނާއި އުޚުތުންގެ މަތީން އަހަރެމެން ހަނދާންކުރާން ޖެހެއެވެ،" އިމާމު ވިދާޅުވިއެވެ.

ޚުތުބާ ނިންމަވާލައްވަމުން އިމާމު ވިދާޅުވީ، ޢީދު ރަމްޒުކޮށްދެނީ އިންސާނީ އެއްބައިވަންތަކަމާއި އޯގާތެރިކަމުގެ ޝިޢާރުތައް ކަމަށެވެ.