މިޔަންމާއަށް އައި ނުރައްކާތެރި ބިންހެލުމުގައި މަރުވި މީހުންގެ އަދަދު 1,002 އަށް އަރައިފިކަމަށް އެ ޤައުމުގެ ކަމާބެހޭ އިދާރާތަކުން ހާމަކޮށްފިއެވެ. މީގެ އިތުރުން 2,300 އަށްވުރެ ގިނަ މީހުން ޒަޚަމްވެފައިވާ އިރު، 30 މީހުން އަދިވެސް ވަނީ ގެއްލިފައެވެ.

ހުކުރު ދުވަހު ކުރިމަތިވި މި ބިންހެލުމަކީ ރިކްޓަރ ސްކޭލްގައި 7.7 ގެ ބިންހެލުމެކެވެ. މި ބިންހެލުން އައި ސަގައިންގ ސަރަޙައްދުގައި، އޭގެ 12 މިނެޓް ފަހުން ރިކްޓަރ ސްކޭލްގައި 6.4 ގެ އިތުރު ބިންހެލުމެއް އައިސްފައިވާކަމަށް ޔޫ.އެސް ޖިއޮލޮޖިކަލް ސަރވޭއިން ބުނެފައިވެއެވެ.

މި ހާދިސާއާ ގުޅިގެން މިޔަންމާއިން އިންސާނީ އެހީއަށް އެދުމާ ގުޅިގެން ޗައިނާ، އިންޑިއާ، ރަޝިއާ އަދި އދ. ވަނީ އެންމެ ފުރަތަމަ އިޖާބަދީފައެވެ. ޗައިނާގެ އީސްޓަން އެއަރލައިންސްގެ ފްލައިޓެއްގައި 37 ސަލާމަތްކުރާ މީހުންނާއި 5 ޓަނުގެ މެޑިކަލް ސަޕްލައިސް އަދި ޓެންޓް ވަނީ ހޮނިހިރު ދުވަހު ޔަންގޫންއަށް ގެންގޮސްފައެވެ. އިންޑިއާއިން ވެސް ވަނީ 15 ޓަނުގެ އެހީގެ ތަކެތި ފޮނުވާފައެވެ.

ރަޝިއާގެ އިމަޖެންސީ ސިޓުއޭޝަންސް މިނިސްޓްރީން ވަނީ ދެ މަތިންދާބޯޓެއްގައި 120 މުވައްޒަފުން ފޮނުވާފައެވެ. މީގެ ތެރޭގައި އެނެސްތީސިއޮލޮޖިސްޓުންނާއި، ސައިކޮލޮޖިސްޓުންނާއި، ސަލާމަތްކުރާ ޓީމުތަކާއި، ކޭ9 ޔުނިޓްތައް ހިމެނެއެވެ. އދ. އިން ވަނީ 5 މިލިއަން ޑޮލަރުގެ ކުއްލި އެހީ ދޭން ނިންމާފައެވެ.

އަވައްޓެރި ތައިލެންޑްގައި ވެސް މި ބިންހެލުމުގެ ސަބަބުން ބޮޑެތި ގެއްލުންތަކެއް ވެފައިވެއެވެ. އެ ޤައުމުގެ 11 ޕްރޮވިންސްއަށް އަސަރުކޮށްފައިވާ އިރު، ބެންކޮކްގައި ހުރި އުސް އިމާރާތެއް ވެއްޓި، 8 މީހުން މަރުވެ، 101 މީހުން ގެއްލިފައިވާކަމަށް އެ ޤައުމުގެ އޮތޯރިޓީތަކުން ބުނެފައިވެއެވެ.

މެލޭޝިއާ، އިންޑޮނޭޝިއާ، އޮސްޓްރޭލިއާ، ޕާކިސްތާން އަދި ނިއުޒީލެންޑް ފަދަ ޤައުމުތަކުން ވަނީ މިޔަންމާއަށް އިތުރު އެހީތެރިކަން ފޯރުކޮށްދޭނެކަމަށް ބުނެފައެވެ.