‏މަޖުލީސް މެންބަރުންގެ މުސާރާ އާ އިނާޔައްތައް ކުޑަކުރަން ދެކޮޅު ކަމަށް ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެ އެވެ.

މެންބަރުންގެ މުސާރަ ކުޑަކުރުމަށް ގޮވާލާ ޕެޓިޝަނެއްގައި ސޮއިކުރަން ފެށުމާއި ގުޅިގެން އެކަމާ ދެކޮޅު ހައްދަވާ އޭނާ ވިދާޅުވީ މަޖުލީސް މެންބަރުން އަދާކުރަމުން ދަނީ ވަރަށްބޮޑު ގައުމީ އަދި ފަރުދީ ޒިންމާއެއް ކަމަށެވެ.

އަދި ވިދާޅުވީ މިހާރު ވެސް ލިބޭ މުސާރައިން ދެކޮޅު ނުޖެހޭ ކަމަށެވެ. މެންބަރުންނަަށް ދޭ ލިވިން އެލަވަންސް އަށް ވުރެ އެޕާޓްމެންޓު ތަކުގެ ކުލި ބޮޑު ކަމަށް ވެސް ވިދާޅުވި އެވެ.

Advertisement

“ދާއިރާގެ ކޮންމެ ރަށެއްގައި ހިންގާ ކުޅިވަރު މުބާރާތްތަކާއި ތަރައްގީގެ މަސްރޫއު ތަކަށް އެތަކެއްހާސް ރުފިޔާ ކޮންމެ މަހަކު ހަރަދު ކުރެވޭ. މީގެ އިތުރުން ދާއިރާގެ ރައްޔިތުން ބޭސްފަރުވާ އަށް މާލެ އައުމުން އަދި ރާއްޖެއިން ބޭރައް ބޭސްވަރުވާ އަށް ދާ ރައްޔިތުންނަށް އެތައްހާސް ރުފިޔާއެއް ކޮންމެ މަހަކު ހަރަދުވޭ،” މެންބަރުންނަކީ ދާއިރާގެ މެންބަރުންނަށް ވެެސް އެހީވާ ބައެއްކަން ފާހަގަކޮށް އައްބާސް ވިދާޅުވި އެވެ.

އޭނާ ވިދާޅުވީ ކޮންމެ ހާލަތެއް ދިމާވިއަސް ދާއިރާގެ މެޖޯރިޓީ ރައްޔިތުން ގުޅަމުން ދަނީ ދާއިރާގެ މަޖުލީސް މެންބަރަށް ކަމަށާ ބޮޑު މުސާރަ ލިބޭ އެހެން އެއްވެސް ސިޔާސީ ބޭފުޅަކަށް ދާއިރާގެ ރައްޔިތުން ނުގުޅާނެ ކަމަށެވެ.

މަޖުލީސް މެންބަރުންގެ މުސާރައަށް ވުރެ މިނިސްޓަރުންނާއި ސްޓޭޓް މިނިސްޓަރުންނާއި ކުންފުނި ތަކުގެ އެމްޑީންގެ މުސާރަ ބޮޑުވާނެ ކަމަށް ވެސް ވިދާޅުވި އެވެ.

ސިޔާސީ ބަޔަކު އިސްވެ ތިބެ ރައްޔިތުންގެ މަޖުލީސް މެންބަރުންގެ މުސާރަ ކުޑަކުރުމަށް ބަޔަކު އިސްވެ ތިބެ ޕެޓިޝަނެއްގައި ސޮއި ކުރުވަމުންދަނީ ވަރަށް މަކަރުވެރި ރޭވުމެއްގެ ތެރެއިން ކަމަށް ވެސް އޭނާ ވިދާޅުވި އެވެ.

“ހަގީގަތުގައި ރައްޔިތުން ތިއްބެވީ ވަރަށް ދަތި ހާލަތުގައި، އާސަންދަ ލިބުނެއް ކަމަކު ރާއްޖެއިން ބޭރައްގޮސް ތިބުމާ، ކެެއުމާ، ޓެކްސީ ހަރަދު ތައް ކުރުމަށް އެތައްހާސް ރުފިޔާއެއް ހަރަދު ކުރަން ޖެހުމާ އެކު ނިކަމެތި ރައްޔިތުމީހާ އަށް ކަން ކަން މަގުފަހިކޮށް ދެނީ ހަމައެކަނި ރައްޔިތުން މަޖުލީސްގެ މެންބަރުން. މިއަދު އެނިކަމެތި ރައްޔިތުންނާ އަޅާލަން ތިބި ދާއިރާތަކުގެ ރައްޔިތުންގެ މަޖުލީސް މެންބަރުންގެ މުސާރަ ކުޑަކުރަން ބަޔަކު އެއުޅެނީ ރައްޔިތުންނަށް ހަމައެކަނި އެހީތެރިކަމެއް ދެމުން ދަނީ މަޖުލީސް މެންބަރުން ކަމައްވެފައި ރައްޔިތުން އިތުރައް ނިކަމެތިކުރުމުގެ މަކަރުވެރި ނިޔަތުގައި. އެހެން އެއްވެސް ބޭނުމަކު ނޫން،”

އޭނާ އަދި ވިދާޅުވީ ސިފައިންނާއި ފުލުހުންގެ މައިންބަފައިންނާ އާއިލާއަށް މުޅިން ހިލޭ ބޭސްފަރުވާ ކުރެވޭއިރު މަޖުލީސް މެންބަރުންގެ މައިންބަފައިންއަށް އެ ޕެކޭޖުގެ ތެރެއިން ބޭސްފަރުވާ ނުކުރެވޭ ކަމަށެވެ.