ދިވެހީންގެ ދިރިއުޅުމަށް މިދިޔަ ވިއްސަކަށް ތިރީހަކަށް އަހަރުތެރޭ ބޮޑެތި ބަދަލުތަަކެއް އަތުވެއްޖެ އެވެ. އެ ބަދަލުތަކާ އެކު ދިވެހީންގެ އެންމެ ފާހަގަކޮށްލެވޭ ސިފަތަކަށް ވެސް ބަދަލު އައިސްފައިވާ ކަމަށް ބުނުމަކީ ދޮގަކަށް ނުވާނެ އެވެ. އެއް ކަމަކީ ދިވެހީންގެ މެދުގައި އޮތް އެކުވެރިކަމެވެ. އެއްބައިވަންތަ ކަމެވެ. އެ ސިފަތައް މުޅީން ގެއްލި ދިޔައީ އެކޭ ނޫނެވެ. ނަމަވެސް ކުރީން އޮތް މިންވަރަށް ނެތީ އެވެ. އެކި ސަރަހައްދުތަކާއި އަވަށްތަކުގައި, އެ ސަރަހައްދުތަކާއި އަވަށްތަކުގައި މީހުންގެ މެދުގައި އޮތް ގުޅުންތައް އެކި ސަބަބުތަކާ ހެދި ވަނީ ހީނަރުވެފަ އެވެ. ޚާއްސަކޮށް މާލޭގަ އެވެ.

ދިވެހީންގެ ބޮޑު އާބާދީއެއް އޮތީ ވެރިރަށް މާލޭގަ އެވެ. ރާއްޖޭގެ ހުރިހާ ރަށެއްގެ މީހުން މާލޭގައި އެބަ އުޅެ އެވެ. މާލޭގައި އެފަދަ ގުޅުންތައް ހީނަރުވުމުގެ އެއް ސަބަބަކަށް އެކަން ވެދާނެ އެވެ. ކުރީއްސުރެ އެކުގައި އުޅުނު މީހުން އެކި ތަންތަނަށް ދިރިއުޅުން ބަދަލު ކުރަން ޖެހުމާއި ކުރީން އޮތް މާހައުލު ބަދަލުވެގެން ދިއުމަކީ އެ ގުޅުންތައް ހީނަރުވީ ސަބަަބުތަކެވެ.

ނަމަވެސް އެ ބަދަހިކަމާއި އެކުވެރިކަން އަޅުގަނޑުމެންގެ މުޖްތަމައުގެ ތެރެއިން މުޅީން ނެތިގެން ނުދެއޭ ބުނަން ޖެހޭފަދަ ރީތި ނަމޫނާ އަދިވެސް މި މާލެއިން އެބަ ފެނެ އެވެ. އެފަދަ އެއް ނަމޫނާ އަކީ މުއިވެޔޮ ފަސްއަނގޮޅި ކަންމައްޗަށް ނިސްބަތްވާ މީހުންގެ މެދުގައި އޮތް އެކުވެރިކަމާއި ބަދަހި ކަމެކެވެ.

އެންމެ ކުރީއްސުރެ ވެސް މާލެއިން މިއީ ފާހަގަކޮށްލެވޭ ސަރަހައްދެކެވެ. މިއީ މާލޭގެ ބޮޑެތި ޚިދުމަތްތެރީން އުފެދުނު ހިސާބެކެވެ. އާއިލާތަކުގެ މެދުގައި ވަރަށް ބޮޑު ބަދަހި ކަމެއް އަބަދުވެސް އޮވެ އެވެ. އެ އާއިލާތަކުގެ މެދުގައި އޮތީ ވަރަށް ގާތް ކަމެކެވެ.

އެ ގުޅުންތައް އެގޮތުގައި ދެމެހެއްޓުމަށް މިއަދު ނިކުމެ ތިބީ މުއިވެޔޮ ފަސްއަނގޮޅި ކަންމަތި ޒުވާނުންނެވެ. އެއީ އެ ސަރަހައްދުގެ ދޮށީ އުމުރުގެ ހުރިހާ ރައްޔިތުންނަށް ވަރަށް ބޮޑު އުފަލަކާއި ހިތްހަމަޖެހުމެއް ގެނެސްދިން ކަމެކެވެ.

މި މުބާރާތަކީ މުއިވެޔޮ ފަސްއަނގޮޅި ކަންމަތި ދިރިއުޅޭ އާއިލާތަކަށް ޚާއްސަ މުބާރާތެކެވެ. މިއީ ގުޅުންތައް ބަދަހި ކުރުމުގެ ވަރަށް މުހިންމު މުބާރާތަކަށް ވަނީ ވެފަ އެވެ. އެހެން ކަމުން އަހަރުން އަހަރަށް މުބާރާތުގެ ފެންވަރު ރަނގަޅު ކުރުމަށް ޒުވާނުން ވަރަށް ޚާއްސަ އިސްކަމެއް ދެ އެވެ.

މުއިވެޔޮ ފަސްއަނގޮޅި ކަންމަތިން އިންތިޒާމުކުރި ޤުރުއާން މުބާރާތް: އެ ސަރަހައްދުން ފެންނަނީ ނަމޫނާ އެއްބައިވަންތަކަމެއް

މި އަހަރުގެ ރަމަޟާން މަހަށް ޚާއްސަ ކޮށް ވެސް މި މުބާރާތް ވަނީ ބާއްވާފަ އެވެ. މުބާރާތުގައި އެ ސަރަހައްދުގައި ދިރިއުޅޭ ވަރަށް ގިނަ އާއިލާތަކުގެ ކުޑަކުދީން ބައިވެރިވި އެވެ. ރަށްރަށުން އައިސް އެ ސަރަހައްދުގައި ދިރިއުޅޭ އާއިލާތަކަކީ ވެސް އެ މީހުން ދެކޭ ގޮތުގައި އެ ސަރަހައްދަށް ނިސްބަތްވާ މާލޭގެ އާއިލާތައް ފަދަ އާއިލާތަކެކެވެ. އެހެން ކަމުން އެއްވެސް ތަފާތު ކުރުމެއް ނެތި މުބާރާތުގައި ބައިވެރިވުމުގެ ފުރުސަތު ދެ އެވެ.

މުޅި މުބާރާތުގެ ހުރިހާ ކަމެއްގައި ވެވުނު މިންވަރަކުން އެ ސަރަހައްދުގެ ހުރިހާ އާއިލާތަކެއްހެން ބައިވެރިވެ އެވެ. މުބާރާތް ރާވާ ހިންގީ އެ ސަރަހައްދުގައި ވިޔަފާރި ހިންގާ "ދޫނި ފިހާރަ" އިންނެވެ. މުބާރާތުގެ ހުރިހާ ޓްރޮފީތަކާއި އެ ނޫން ވެސް މުހިންމު ހުރިހާ މަސައްކަތެއް ކޮށްފައި ވަނީ "ކޮމްޕްލީޓް ކްރާފްޓް ސްޓޫޑިއޯ" އިންނެވެ. އެއީ ވެސް އެ ސަރަހައްދުގައި ހިންގާ ވިޔަފާރި އެކެވެ.

މުބާރާތުގެ ނަތީޖާ ފާޅުކުރުމުގެ ރަސްމިއްޔާތާއި ގުޅިގެން އެ ސަރަހައްދުގައި ހިންގާ "ޓްރިގޮން ކެފޭ" ބަންދުކޮށް އެތަނުގެ ގޮނޑިތަކާއި އެހެނިހެން ހުރިހާ ވަސީލަތްތަކެއް ފޯރުކޮށްދިނެވެ. އިވެންޓްގެ އޯޑިއޯ އަދި ސައުންޑާއި ލައިޓިންގެ މަސައްކަތް ކޮށްދިނީ ވެސް އެ ސަރަހައްދަށް ނިސްބަތްވާ "ސްވެންކް އިވެންޓްސް" ގެ ފަރާތުންނެވެ.

މުއިވެޔޮ ފަސްއަނގޮޅި ކަންމަތިން އިންތިޒާމުކުރި ޤުރުއާން މުބާރާތް: އެ ސަރަހައްދުން ފެންނަނީ ނަމޫނާ އެއްބައިވަންތަކަމެއް

މުބާރާތަށް އިނާމުތައް ހުށައަޅައިދިނީ އާއިލާތަކުންނެވެ. ވަރަށް ގިނަ އާއިލާތަކުން ފައިސާގެ އިނާމު ހުށައެޅި އެވެ. ވެވުނު މިންވަރަކުން އެހީތެރިވެ ދިނެވެ. 

މި އަހަރުގެ މުބާރާތުގެ އެއްވަނަ އަށް ވެސް ވަނީ 10,000 ރުފިޔާގެ ފައިސާގެ އިނާމު ދީފަ އެވެ. އަދި ކޮންމެ އުމުރުފުރައަކުން ވަނަވަނައަށް އައި ދަރިވަރުންނަށް ވެސް ވަނީ ފައިސާގެ އިނާމު ދީފަ އެވެ.

މި ހުރިހާ ފައިސާއަކީ ވެސް މުއިވެޔޮ ފަސްއަނގޮޅި ކަންމަތި އާއިލާތަކުން ހަދިޔާ ކުރި ފައިސާ އެވެ. މި އަހަރުގެ މުބާރާތުގެ އެއްވަނަ ހޯދީ މަލްކިޔާ ޢީން އަޝްރަފެވެ. އެ ދަރިވަރަށް 10.000 ރުފިޔާގެ އިތުރުން ޔޫރޯ ސްޓޯރުުން ހުށައެޅި 700 ރުފިޔާގެ ވައުޗަރާއި ޓްރޮފީއާ މެޑަލް ދީފައިވެ އެވެ.

މި އަހަރުގެ އެއްވަނަ ހޯދި ދަރިވަރަށް އަލީ ރަމީޒު އިނާމު ހަވާލުކޮށް ދެނީ --

ދެވަނަ ހޯދި އާއިޝަތު އަލްވާ އަހްމަދަށް 7,000 ރުފިޔާ އާއި ޔޫރޯ ސްޓޯރުުން ހުށައެޅި 500 ރުފިޔާގެ ވައުޗަރާއި ޓްރޮފީއާ މެޑަލް ދީފައިވެ އެވެ. ތިންވަނަ ހޯދި މުޙައްމަދު ރައްޔާން އަލީ އަށް 5,000 ރުފިޔާ އާއި ޔޫރޯ ސްޓޯރުުން ހުށައެޅި 250 ރުފިޔާގެ ވައުޗަރާއި ޓްރޮފީއާ މެޑަލް ދީފައިވެ އެވެ.

މީގެ އިތުރުން ހަ އަހަރުން ދަށާއި ނުވަ އަހަރުން ދަށާއި 12 އަހަރުން ދަށުގެ އުމުރުފުރާ އިން އެއްވަނަ, ދެވަނަ އަދި ތިންވަނަ ހޮވާ އިނާމު ދީފައިވެ އެވެ.

މުއިވެޔޮ ފަސްއަނގޮޅި ކަންމަތިން އިންތިޒާމުކުރި ޤުރުއާން މުބާރާތް: އެ ސަރަހައްދުން ފެންނަނީ ނަމޫނާ އެއްބައިވަންތަކަމެއް

މުބާރާތުގައި މި އަހަރު 36 ކުދީން ކިޔެވި އެވެ. މިއީ ކުރީ އަހަރަށް ވުރެ ގިނަ އަދަދެކެވެ. މިއިން ކޮންމެ ކުއްޖަކަށް "ކޮމްޕްލީޓް ކްރާފްޓް ސްޓޫޑިއޯ" ޚާއްސަ ޓްރޮފީއެއް ދިނެވެ. އަދި 500 ރުފިޔާގެ ގިފްޓް ވައުޗާއެއްގެ އިތުރުން އިތުރު ހަދިޔާ ދިނެވެ.

އިނާމު ދިނުމުގެ ހަފްލާ ގައި މުއިވެޔޮ ފަސްއަނގޮޅި ކަންމައްޗަށް ނިސްބަތްވާ ގިނަ ބަޔަކު ބައިވެރިވެފައިވެ އެވެ. އޭގެ ތެރޭގައި ސިޔާސީ ދާއިރާ އިން ފާހަގަކޮށްލެވޭ ބޭފުޅުންނާއި އިޖްތިމާއީ އަދި އެ ނޫން ދާއިރާތަކުން ފާހަގަކޮށްލެވޭ ބޭފުޅުން ވެސް ހިމެނެ އެވެ.

އެކި އިންތިހާބުތަކުގައި އެ ސަރަހައްދުން ވާދަކުރާ އެންމެންހެން އެ ހަރަކާތުގައި ބައިވެރިވަނީ އެކުވެރި ކަމުގެ ރޫހުގަ އެވެ. އެ ސަރަހައްދުގެ އާއިލާތަކުގެ މެދުގައި އޮތް ބަދަހި ކަމުގެ ރަމްޒެއްގެ ގޮތުގަ އެވެ.

މުއިވެޔޮ ފަސްއަނގޮޅި ކަންމަތިން އިންތިޒާމުކުރި ޤުރުއާން މުބާރާތް: އެ ސަރަހައްދުން ފެންނަނީ ނަމޫނާ އެއްބައިވަންތަކަމެއް

ޤުުރުއާން މުބާރާތުގެ އިތުރުން ބޮޑެތި މީހުންނަށް ޚާއްސަކޮށް ޑާޓް މުބާރާތެއް ވެސް ވަނީ ބާއްވާފަ އެވެ. އެ މުބާރާތުން ވަނަވަނައަށް އައި ފަރާތްތަކަށް ވެސް ވަނީ ފައިސާގެ އިނާމާއި ޓްރޮފީ ދީފަ އެވެ.

މިފަދަ ޒަމާނެއްގައި ވެރިރަށުގެ މުއިވެޔޮ ފަސްއަނގޮޅި ކަންމަތިން މި ދައްކައިދެނީ ވަރަށް ރީތި ނަމޫނާ އެކެވެ. ދިރިއުޅުމުގެ ވައްޓަފާޅިއަށް ކޮންމެ ބަދަލެއް އައިނަމަވެސް އަޅުގަނޑުމެންގެ މެދުގައި އޮތް ގުޅުންތަކާއި އެކުވެރިކަން ދެމެހެއްޓޭނެ ކަމެވެ. މިއީ ވެރިރަށުން ފެނުނު ކޮންފަދަ ނަމޫނާ އެއް ހެއްޔެވެ. މުޅި ރާއްޖެއަށް ވެސް މިއީ ނަމޫނާ އެކެވެ.