އައިޕީޔޫގެ ޖެނެރަލް އެސެމްބްލީގައި ބައިވެރިވެވަޑައިގަތުމަށް މަޖިލީހުގެ ރައީސް ޢަބްދުއްރަޙީމް ޢަބްދުﷲ އުޒްބަކިސްތާނަށް ވަޑައިގެންފިއެވެ.

މިއީ މިމަހުގެ 5 އިން 9 އަށް އުޒްބަކިސްތާނުގައި ކުރިއަށްދާ އިންޓަރ-ޕާލިމެންޓަރީ ޔުނިއަންގެ 150 ވަނަ އެސެމްބްލީގައި ބައިވެރިވެވަޑައިގަތުމަށް މަޖިލީހުގެ ރައީސް އެޤައުމަށް ކުރައްވާ ދަތުރުފުޅެކެވެ. 

މި ދަތުރުފުޅުގައި ރައްޔިތުންގެ މަޖިލީހުގެ ރައީސްގެ އަރިހުގައި ރައްޔިތުންގެ މަޖިލީހުގެ މައިނޯރިޓީ ލީޑަރ، ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ބައިވެރިވެ ވަޑައިގަންނަވައެވެ. މީގެ އިތުރުން، މާފަންނު މެދު ދާއިރާގެ މެންބަރު އަސްމާ ރަޝީދާއި، ހުރާ ދާއިރާގެ މެންބަރު ޑރ އަނާރާ ނަޢީމް، މާފަންނު ދެކުނު ދާއިރާގެ މެންބަރު ޢަބްދުﷲ ރިފާޢު އަދި ހެންވޭރު ދެކުނު ދާއިރާގެ މެންބަރު ޙުސައިން އިމްރާން ލަޠީފްވެސް ބައިވެރިވެވަޑައިގަންނަވައެވެ.

އައިޕީޔޫގެ އެ ބައްދަލުވުމުގައި ރައްޔިތުންގެ މަޖިލީހުގެ މިދިޔަ އަހަރުވެސް ބައިވެރިވިއެވެ. އައިޕީޔޫގެ މެމްބަރަކަށް ދިވެހިރާއްޖެ ވީ 2005 ވަނަ އަހަރެވެ. އައިޕީޔޫގައި ތަމްސީލްކުރަނީ، މިނިވަން ޤައުމުތަކުގެ ޤާނޫނު ހަދާ މަޖިލިސްތަކުން ކަނޑައަޅާ މެމްބަރުންނެވެ.