ސިހުރުހަދާކަމުގެ މައުލޫމާތު ލިބިގެން ހއ.ހޯރަފުށީގައި ހިންގި އޮޕަރޭޝަނެއްގައި މީހަކު ހައްޔަރުކޮށްފިއެވެ.
މިކަމާ ގުޅިގެން ފުލުހުން ބުނީ، ހޯރަފުށީގައި އެ އޮޕަރޭޝަން ކުރިއަށްގެންގޮސްފައިވަނީ، ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެންކަމަށެވެ. ސިހުރު ހަދާކަމަށް ތުހުމަތުކުރެވޭ މައްސަލައާ ގުޅިގެން ހިންގި މި އޮޕަރޭޝަނުގައި ހައްޔަރުކޮށްފައިވަނީ، ވ. ކެޔޮދޫ އަށް ނިސްބަތްވާ އެރަށު ތިބުރޯޒުގެ، އުމުރުން 34 އަހަރުގެ މުޙައްމަދު ޢަބްދުލްކަރީމް ކަމަށެވެ.
މި އޮޕަރޭޝަން ހިންގާފައިވަނީ މިހިނގާ އެޕްރީލް މަހުގެ 2 ވަނަ ދުވަހު ހޯރަފުށި ޕޮލިސް ސްޓޭޝަނާއި ފުލުހުންގެ އިންޓެލިޖެންސް ގުޅިގެންނެވެ.
މި މައްސަލައާ ގުޅިގެން މުޙައްމަދު ޢަބްދުލްކަރީމްގެ ބަންދާމެދު ގޮތެއް ނިންމުމަށް ހޯރަފުށީ މެޖިސްޓްރޭޓް ކޯޓަށް ހާޒިރުކުރުމުން ފަސް ދުވަހަށް ބަންދުކުރުމަށް ވަނީ އަމުރުކޮފައެވެ. މި މައްސަލަ ހޯރަފުށި ޕޮލިސް ސްޓޭޝަނުން ދަނީ ތަހުގީގުކުރަމުންދާކަމަށް ފުލުހުން ބުނެއެވެ.
ސިހުރުހެދުމުގެ މައްސަލައަކީ މިހާރު ރާއްޖޭގައި ވަރަށް ބޮޑުވެފައިވާ މައްސަލައެއްކަމަށް ގިނަ ބަޔަކު ބުނެއެވެ. ސިހުރުގެ ސަބަބުން އާއިލާތައް ވަކިވުމާއި މީހުންގެ ދިރިއުޅުން ހަލާކުވުމުގެ އިތުރުން ކިޔަވަމުން އަންނަ ދަރިވަރުންނަށްވެސް އެކަމުގެ އުނދަގޫ ޖެހިފައިވާކަމަށް ގިނަ ބަޔަކު ފާހަގަކުރެއެވެ.
Advertisement
This content is created and paid for by advertisers and does not involve Voice Journalists
