އޮސްޓްރޭލިއާގެ ފްރެމެންޓަލް ޕާތުން ފުރައިގެން ރާއްޖެ އައި "އެމްއެސްސީ މެގްނިފިކާ" ކްރޫޒް ލައިނާއަށް މޯލްޑިވްސް އިމިގްރޭޝަނުން ކްލިއަރަންސްދީފިއެވެ.

އިމިގްރޭޝަނުން ބުނީ އެމްއެސްސީ މެގްނިފިކާއިން ރާއްޖެއަށް ޒިޔާރަތްކުރި 2،818 ފަތުރުވެރިންނަށް ކްލިއަރެންސް ދީފައިވާކަމަށެވެ. މީގެ ތެރޭގައި ހިމެނެނީ، 1،866 ފަސިންޖަރުންނާއި 952 ކްރޫއިންނެވެ. މި ކްރޫޒްލައިނާ ރާއްޖެ އައިސްފައިވަނީ، މިދިޔަ މަހުގެ 27 ވަނަ ދުވަހު އޮސްޓްރޭލިއާގެ ފްރެމެންޓަލް ޕާތުންނެވެ. 

މިއީ މިހާތަނަށް އެންމެ ދިގުދަތުރެއްކޮށްފައި ރާއްޖެއައިކަމަށް ރެކޯޑްކުރެވުނު ކްރޫޒްލައިނާއެވެ. އޮސްޓްރޭލިއާއިން "އެމްއެސްސީ މެގްނިފިކާ" ރާއްޖެ އައިސްފައިވަނީ ޕެސިފިކް ކަނޑު ހުރަސްކޮށެވެ.

ކްރޫޒްލައިނާތަކުގެ މެދުގައި އެންމެ މަޤްބޫލް މަންޒިލްތަކުގެ ތެރޭގައި ދިވެހިރާއްޖެ ހިމެނެއެވެ. އެންމެފަހުން މިދިޔަ މާޗްމަހުގެ ތެރޭގައި ރާއްޖެއަށް ވަނީ، ދުނިޔޭގެ އެކި ޤައުމުތަކަށް ދަތުރުކުރަމުން އަންނަ ކްރޫޒްލައިނާއެއްކަމަށްވާ، "އެމްއެސް ކްރިސްޓަލް ސިންފަނީވެސް ރާއްޖެ އައިސްފައެވެ. އެއީ އެ ކްރޫޒްލައިނާ ރާއްޖެ އައި ދެވަނަ ފަހަރެވެ. މިއަހަރުގެ ތެރޭގައި 8 ކްރޫޒްލައިނާ ވަނީ ރާއްޖެ އައިސްފައެވެ. 

މިއަހަރު ރާއްޖެއަށް އެންމެގިނައިން ކްރޫޒްލައިނާއިން މީހުން އައިސްފައިވަނީ އައު އަހަރާ ދިމާކޮށެވެ. އައު އަހަރާ ދިމާކޮށް ރާއްޖެއަށް ބަނދަރުކުރި ކްރޫޒްލައިނާތަކުން 5 ހާހަށްވުރެ ގިނަ ދަތުރުވެރިންނަށް ވަނީ ކްލިއަރަންސްދީފައެވެ. ކްރޫޒްލައިނާ މާކެޓަކީ ރާއްޖޭގެ ފަތުރުވެރިކަމުގެ ސިނާއަތުގައި ކުރިއަރަމުން އަންނަ ވަރަށް މުހިއްމު މާކެޓެއްކަމަށް ޓޫރިޒަމް ސިނާއަތުން ފާހަގަކުރެއެވެ.