ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުގެ ރައީސް ކަމުގެ މަގާމަށް އައްޔަން ކުރައްވާފައިވާ ގއ. ދެއްވަދޫ، ދޭލިޔާގެ މުޙައްމަދު އަނަސް އަށް ރުހުން ހޯދުމުގެ މައްސަލަ ރައްޔިތުންގެ މަޖިލީހުގެ ކަމާ ބެހޭ ކޮމިޓީއަށް ފޮނުވައިފިއެވެ.

މިއަދުގެ ޖަލްސާގައި، ރައީސް ޑރ. މުހައްމަދު މުއިއްޒު އަނަސް އަށް ރުހުން ހޯދުމަށް މަޖިލީހަށް ފޮނުއްވި ސިޓީ ވަނީ އިއްވާފައެވެ. އެއަށްފަހު ރިޔާސަތުން ވަނީ މި މައްސަލަ ދިރާސާ ކުރުމަށް މަޖިލީހުގެ ސްޓޭޓް އޯންޑް އެންޓަޕްރައިޒަސް ކޮމިޓީއަށް ފޮނުވާފައެވެ.

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ ރައީސަކަށް ފިނޭންސް މިނިސްޓްރީގެ ޑެޕިއުޓީ މިނިސްޓަރުގެ މަގާމުގައި ހުންނެވި މުޙައްމަދު އަނަސް ހަމަޖެއްސެވީ މާރިޗު މަހުގެ 13 ވަނަ ދުވަހުއެވެ. 

Advertisement

އަނަސް ވަނީ ގައުމީ ޔުނިވާސިޓީއިން މާސްޓާ އޮފް ބިޒްނަސް އެޑްމިނިސްޓްރޭޝަން ހާސިލު ކުރައްވާފަ އެވެ. އޭނާ އެންމެ ފަހުން ހުންނެވީ މިނިސްޓާ އޮފް ފިނޭންސް އެންޑް ޕްލޭނިންގގެ ނައިބުގެ މަގާމުގަ އެވެ. ހައުސިން ޑިވެލޮޕްމަންޓް ކޯރޕަރޭޝަންގެ އޮޑިޓް މެނޭޖަރުކަމާއި މޯލްޑިވްސް ބިޒްނަސް ސްކޫލުގެ އެސޯސިއޭޓް ޕްރޮފެސަރުގެ މަގާމު ވެސް ކުރީން ފުރުއްވާފައިވެ އެވެ.

އަނަސްގެ ކުރީން ޕީސީބީގެ ރައީސަކަށް ހުންނެވީ ހަމްދީ އަގީލް އެވެ. ހަމްދީ އެ މަގާމުން ވަކިކުރެއްވީ ފެބްރުއަރީ މަހުގެ 13 ވަނަ ދުވަހު އެވެ.

ޕީސީބީ އަކީ ދައުލަތުގެ ވިޔަފާރި ތަންތަން ޕްރައިވެޓައިޒް ކުރުމާއި ކޯޕަރަޓައިޒް ކުރުމާއި ސަރުކާރުގެ ކުންފުނިތައް މޮނީޓާކުރުމުގެ ބޭނުމުގައި ގާނޫނުން އުފައްދާފައިވާ ބޯޑެކެވެ. 

ޕީސީބީގެ ބޯޑަށް ރައީސް ޑރ. މުޙައްމަދު މުޢިއްޒު ހަމްދީ ޢައްޔަންކުރެއްވީ 2023 ވަނަ އަހަރުގެ ނޮވެމްބަރ މަހުގެ 22 ވަނަ ދުވަހުގައެވެ.