އިޒްރޭލުގެ ޕާސްޕޯޓުގައި ރާއްޖެ އެތެރެނުވެވޭނެ ގޮތަށް އެ ޕާސްޕޯޓު މަނާ ކުރަން ހުށަހަޅާފައިވާ ބިލުގެ މަސައްކަތް ލަސް ކުރާތީ މަޖިލީހަށް ހުށަހެޅި ކުއްލި މައްސަލަ ބަލައި ނުގަންނަން މަޖިލީހުގެ ރިޔާސަތުން ނިންމަވައިފިއެވެ.

މި ކުއްލި މައްސަލަ ހުށަހެޅުއްވީ އިދިކޮޅު އެމްޑީޕީއަށް ނިސްބަތްވާ ކެންދޫ ދާއިރާގެ މައުރޫފް ޒާކިރެވެ. 

އެ މައްސަލަ ބަލައިގަންނަވަން ނުފެންނަކަން ހާމަކުރައްވައި މިއަދު ރިޔާސަތުގައި އިންނެވި މަޖިލީހުގެ ނައިބު ރައީސް އަހުމަދު ނާޒިމް ވިދާޅުވީ ކުއްލި މައްސަލައަކީ ރައްޔިތުންގެ ނުވަތަ ގައުމުގެ މަސްލަހަތަށް ސީދާ އަސަރު ކުރާފަދަ ބޮޑު ކަމެއް ކުއްލިއަކަށް ދިމާވުމުން އެކަމެއް ސަރުކާރުގެ ސަމާލުކަމަށް ގެނައުމަށާއި ސަރުކާރުން އެކަމަށް އަޅާފައިވާ ނުވަަތަ އަޅާފައިނުވާ ފިޔަވަޅަކާމެދު ފާޑުކިޔުމަށް ހުށަހެޅިފައިވާ މައްސަލައަކަށް ވާންވާނެ ކަމަށެވެ.

ނަމަވެސް އެ މައްސަލާގައި އެ ޝަރުތުތައް ހަމަ ނުވާތީ ކުއްލި މައްސަލައެއްގެ ގޮތުގައި ބަލައިގަންނަން ނުފެންނަ ކަމަށް ވިދާޅުވިއެވެ. 

އިސްރާއީލުގެ ޕާސްޕޯޓުގައި ދިވެހިރާއްޖެއަށް އައުން މަނާކުރުމަށް، 2 ޖޫން 2024 ގައި އެމްޑީޕީގެ ފަރާތުން ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް އިމިގްރޭޝަން ގާނޫނަށް އިސްލާހެއް ވަނީ ހުށަހަޅާފައެވެ.

އެ މައްސަލަ މަޖިލީހުގައި ސަލާމަތީ ހިދުމަތްތަކާ ބެހޭ ކޮމިޓީ، 241 ކޮމިޓީގައި އޮންނަތާ، އަހަރެއްވާން ދެން އޮތީ ދެ މަސްދުވަހެއްހާ ދުވަހެވެ.

އެ އިސްލާހަށް ހިޔާލު ހޯދުމަށް މަޖިލީހުގައި ސަލާމަތީ ހިދުމަތްތަކާ ބެހޭ ކޮމިޓީ، 241 ކޮމިޓީއަށް ކަމާގުޅުންހުރި އެކިއެކި ފަރާތްތައް ވަނީ މަޖިލީހުގެ މިދިޔަ ދައުރުގައި ވެސް ހާޒިރުކޮށްފައެވެ.

އެގޮތުން، ގެސްޓްހައުސް އެސޯސިއޭޝަނުގެ ވެރިން ހާޒިރު ކުރުމުން އެފަރާތްތަމުން އެދިފައިވަނީ ”ޓާގެޓެޑް އެޕްރޯޗެއް“ ނުވަތަ ވަކި ބަޔަކު މަނާކުރުން ކަމަށެވެ. އެ އެސޯސިއޭޝަނުން އެދުނީ އިސްރާއިލުން ސިފައިންވެސް ނުހިމެނޭ ގޮތަށް ވެރިންގެ ޕާސްޕޯޓް މަނާކުރުމަށެވެ.

ގެސްޓްހައުސް އެސޯސިއޭޝަނުން އެދުނު ގޮތަށް ތާއީދުކޮށް މަޓާޓޯއިންވެސް އެދުނީ އެގޮތުގެ މަތީން އިސްރާއީލް ޕާސްޕޯޓް މަނާ ކުރުމަށެވެ.