ފަލަސްތީނުގެ މިނިވަން ކަމަށް މަސައްކަތް ކުރާ ޣައްޒާގެ މުޖާހިދުންނަށް ތާއީދު އޮތްކަން ހާމަކުރަން އަންނަ ހުކުރު ދުވަހު ސައިކަލު ބުރެއް ބާއްވަން ނިންމައިިފި އެވެ.

މި ސައިކަލު ބުރު އިންތިޒާމު ކުރަނީ ރާއްޖޭގެ ބައެއް ދީނީ އިލްމުވެރީންނާއި ގިނަ އަދަދެއްގެ ޖަމިއްޔާ ޖަމިއްޔާތައް ގުޅިގެންނެވެ. އިލްމުވެރީންނާއި ޖަމިއްޔާތަކުން އެކަން ހާމަކުރުމަށް މިރޭ ވަނީ ނޫސްވެރީންގެ ބައްދަލްވުމެއް ބާއްވާފަ އެވެ.

އެ ބައްދަލްވުމުގައި ދީނީ އިލްމުވެރިޔާ އައްޝައިހް އާދަމް ނިޝާން ވިދާޅުވީ ފަލަސްތީނުގެ މިނިވަން ކަމަށް މަސައްކަތް ކުރާ ޣައްޒާގެ މުޖާހިދުންނަށް ތާއީދު އޮތްކަން ހާމަކުރަން ގިނަ ހަރަކާތްތަކެއް ކުރިއަށް ގެންދާނެ ކަމަށެވެ. އެ ހަރަކާތްތަކުގައި ބައިވެރިވުމަށް އެދިފައިވެ އެވެ.

Advertisement

ހުކުރު ދުވަހު ސައިކަލު ބުރު ފެށޭނީ ރަސްފަންނު ކައިރީން ހަވީރު 4:30 ގަ އެވެ. ސައިކަލު ބުރު އޮންނާނީ މަޖީދީމަގާއި ބޮޑުތަކުރުފާނު މަގުގަ އެވެ. އަދި ރެލީ ނިންމާލުމުގެ ގޮތުން ޚާއްސަ ހަރަކާތެއް އޮންނާނެ އެވެ.

މި ހަރަކާތުގައި 50 ވުރެ ގިނަ އިލްމުވެރީން ބައިވެރިވާނެ އެވެ. ސައިކަލު ބުރުގައި ވީހާވެސް ގިނަ ބަޔަކު ބައިވެރިވުމަށް ވަނީ އެދިފަ އެވެ.