ފިޠުރު ޒަކާތުން ފަލަޞްޠީނަށް ފޮނުވި ބައިމިލިއަން ރުފިޔާގެ ކާބޯތަކެތި ނިކަމެތި ޢާއިލާތަކަށް ބަހައިފިއެވެ. 

މިކަން ހާމަކުރައްވައި އިސްލާމީ ކަންތައްތަކާ ބެހޭ ވަޒީރު ޝަހީމް ވިދާޅުވީ، ޒަކާތު ހައުސްއަށް ދިވެހި ރައްޔިތުން ހަވާލުކުރި ފިޠުރު ޒަކާތުން ފަލަޞްޠީނުގެ ޣައްޒާގެ ބަނޑުހައި ހޫނުކަމުގައި ޖެހިފައިވާ އާއިލާތަކަށް ފޮނުވި ބައިމިލިއަން ދިވެހި ރުފިޔާގެ ކާބޯތަކެތި ޢާއިލާތަކާ ހަމައަށް ވާސިލްވެފައިވާ ކަމަށެވެ. 

ވަޒީރު ވަނީ ކާބޯތަކެތި ފޮށީގައި ބަންދުކުރުމާއި، އެ ތަކެތި ބެހުމުގެ މަސައްކަތް ކުރާ ތަނުގެ ވީޑިއޯއެއްވެސް އެކްސްގައި ހިއްސާކުރައްވާފައެވެ. 

Advertisement

ދިވެހިރާއްޖޭގެ ޒަކާތު ހައުސްއިން މި ފައިސާ ހަވާލުކޮށްފައިވަނީ އިސްރާ އެސޯއިއޭޝަނާއެވެ. އަދި އެ އެސޯސިއޭޝަނާއި ފަލަސްޠީނުގައި ހަރަކާތްތެރިވާ އެހީދޭ ފަރާތްތައް ގުޅިގެން މި އެހީ މިހާރުވަނީ ފަލަސްޠީނު ރައްޔިތުންނާއި ހަމައަށް ފޯރުކޮށްދީފައެވެ.

ޒަކާތު ފަންޑު މެދުވެރިކޮށް މީގެ ކުރިންވެސް ފަލަސްތީނަށް ގިނަ އެހީތަކެއް ވެދީފައިވާކަން ފާހަގަކޮށްލެވެއެވެ.