މިއަހަރުގެ މާރޗްމަހުގެ ނިޔަލަށް ރާއްޖެއަށް 632،422 ފަތުރުވެރިން ޒިޔާރަތްކޮށްފައިވާކަމަށް އިމިގްރޭޝަނުން ބުނފިއެވެ.

މޯލްޑިވްސް އިމިގްރޭޝަނުން މިއަދު ނެރެ އާއްމުކޮށްފައިވާ ރާއްޖެއަށް ޒިޔާރަތްކުރި މީހުންގެ ތަފާސްހިސާބުތަކަށް ބަލާއިރު، ހުސްވި މާޗްމަހު އެކަނިވެސް ރާއްޖެއަށް 203،468 ފަތުރުވެރިން ވަނީ ޒިޔާރަތްކޮސްފައެވެ. މިއީ މިދިޔަ އަހަރުގެ މާރޗްމަހާ އަޅާބަލާއިރު، 9,246 ފަތުރުވެރިންގެ އިތުރުވުމެކެވެ.

އަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދަށް ބަލާއިރު، ޖުމްލަ ގޮތެއްގައި ދުވާލަކު 6،563 ފަތުރުވެރިން ރާއްޖެއަށް ޒިޔާރަތްކުރިއެވެ. އެއްދުވަހަކާ އެންމެގިނައިން ޒިޔާރަތްކުރި ފަތުރުވެރިންގެ އަދަދަކީ 9،605 އެވެ. އަދި އެއްދުވަހާ އެންމެ މަދުން ޒިޔާރަތްކުރި އަދަދަކީ 5،251 އެވެ.

Advertisement

މިދިޔަ މަހު އެންމެގިނައިން ފަތުރުވެރިން ޒިޔާރަތްކުރި ޤައުމުތައް:

1. ރަޝިއާ: 24،449

2. އިނގިރޭސިވިލާތް: 23،183

3. އިޓަލީވިލާތް: 19،069

4. ޖަރުމަނުވިލާތް: 17،620

5. ޗައިނާ: 15،803

6. އިންޑިއާ: 11،667

މަންޒިލެއްގެ ގޮތުގައި ރާއްޖޭގެ ޓޫރިޒަމް އިސްތިހާރުކޮށް ރާއްޖެއަށް އަންނަ ފަތުރުވެރިންގެ އަދަދު އިތުރުކުރުމުގެ ގޮތުން މޯލްޑިވްސް މާކެޓިން ޕީއާރު ކޯޕަރޭޝަން، (އެމްއެމްޕީއާރުސީން) ވަނީ މިހާރު ހާއްސަ ކެމްޕެިއންތަކެއް ފަށާފައެވެ. އެގޮތުން އިނގިރޭސި ޕްރިމިއާލީގްގެ ކްލަބް ލިވަޕޫލާއި، އިންޑިއަން ޕްރިމިއާލީގްގެ އެންމެ މަޝްހޫރު އެއް ކްލަބް، މުމްބާއީ އިންޑިއަންސް މެދުވެރިކޮށް ރާއްޖޭގެ ޓޫރިޒަމް އިސްތިހާރުކުރުމުގެ މަސައްކަތް އެ ކޯޕަރޭޝަނުން ވަނީ ފަށާފައެވެ.

މިދިޔަ އަހަރު ރާއްޖެއަށް 2 މިލިއަން ފަތުރުވެރިން އައިސްފައިވާއިރު، ޓޫރިޒަމް މިނިސްޓްރީގެ އަމާޒަކީ މިއަހަރު ނިމުމުގެ ކުރިން އެއަދަދު 2.2 މިލިއަނަށް އިތުރުކުރުމެވެ.