ދިވެހިރާއްޖެއާއި ތުރުކީވިލާތާ ދެމެދު އޮންނަ ވިޔަފާރީގެ ގުޅުން އިތުރަށް ހަރުދަނާކުރުމުގެ މަޤްޞަދުގައި، އިޤްތިޞާދީ ތަރައްޤީއާއި ވިޔަފާރީގެ ވަޒީރު މުޙައްމަދު ސައީދު ރަސްމީ ދަތުރުފުޅެއްގައި ތުރުކީވިލާތަށް ވަޑައިގެންފިއެވެ.

މި ދަތުރުފުޅުގައި ވަޒީރު، ތުރުކީވިލާތުގެ ވިޔަފާރިވެރިންނާއި އެ ޤައުމުގައި މަސައްކަތްކުރައްވާ ދުނިޔޭގެ އެހެން ޤައުމުތަކުގެ ވިޔަފާރިވެރިންނާ ބައްދަލުކުރައްވާ މަޝްވަރާކުރެއްވުމަށް ވަނީ ހަމަޖެހިފައެވެ. މި ބައްދަލުވުންތަކުގައި، ދެ ޤައުމުގެ މެދުގައި އޮންނަ ވިޔަފާރީގެ ގުޅުން އިތުރަށް ވަރުގަދަކުރުމަށް އެޅިދާނެ ފިޔަވަޅުތަކާއި، އައު އިންވެސްޓްމަންޓް ފުރުޞަތުތައް ގެނައުމާ ގުޅޭގޮތުން މަޝްވަރާކުރެވިގެންދާނެއެވެ.

ތިން ދުވަހުގެ މުއްދަތަށް ކުރައްވާ މި ދަތުރުފުޅުގައި، ވަޒީރު ސައީދުގެ އަރިހުގައި އެ ވުޒާރާގެ އިސް އޮފިޝަލުންވެސް ބައިވެރިވެ ވަޑައިގަންނަވައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެ ވަޑައިގަތުމަށްފަހު އެންމެ ފުރަތަމަ ޒިޔާރަތްކުރެއްވި ޤައުމަކީ ތުރުކީވިލާތެވެ. އޭގެ ސަބަބުން، ތުރުކީވިލާތާއި ދިވެހިރާއްޖެއާ ދެމެދު އެކި ދާއިރާތަކުން ގުޅުން ދަނީ ހަރުދަނާވަމުންނެވެ. އަދި ދިވެހިރާއްޖޭގެ އެކި ދާއިރާތައް ކުރިއެރުވުމަށްޓަކައި ތުރުކީވިލާތުން ދަނީ ބޮޑެތި އެހީތަށް ފޯރުކޮށްދެމުންނެވެ.