ނުކުޅެދުންތެރިކަން ހުންނަ މީހުންނަށް ބޭނުންވާ ސިއްހީ އެހީތެރިކަމާއި އިޖުތިމާއީ ރައްކާތެރިކަން ފޯރުކޮށްދިނުމުގެ ޒިންމާ އޮތް ދައުލަތުގެ މުއައްސަސާތަކުން އިހުމާލުވަމުންދާ ކަމަށް ބުނެ ރައްޔިތުންގެ މަޖިލީހަށް ހުށަހެޅި މައްސަލަ ބޭރުކޮށްލައިފި އެވެ.

ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ހުށަހެޅުއްވި މި މައްސަލަ ބަލައިގަތުމަށް ވޯޓު ދެއްވީ އެންމެ 12 މެންބަރުންނެވެ. އަދި 44 މެންބަރުން މައްސަލަ ބަލައި ނުގަތުމަށް ވޯޓް ދެއްވުމުން މައްސަލަ ވަނީ މަޖިލީހުން ބޭރުކޮށްލާފައެވެ. 

މެންބަރު މުހައްމަދު އިބްރާހީމް ހުށަހެޅުއްވި މައްސަލައިގައި، ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ގާނޫނުގެ ދަށުން ނުކުޅެދުންތެރިކަން ހުންނަ ފަރާތްތަކަށް ހާއްސަ އިނާޔަތްތައް ލިބޭނެ ގާނޫނީ ނިޒާމެއް އެކުލަވާލެވިފައިވާކަން ފާހަގަކުރައްވާފައިވާއިރު، ގާނޫނުތަކުން ލާޒިމުކުރާ ހާއްސަ ރައްކާތެރިކަމާއި މާލީ އެހީ އަދި ބޭސްފަރުވާ ފޯރުކޮށްދިނުމުގައި ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އާއި ދައުލަތުގެ ކަމާބެހޭ މުއައްސަސާތަކުން އިހުމާލުވެފައިވާ ކަމަށް ވިދާޅުވެފައިވެއެވެ.

އެ ގޮތުން 2019 ވަނަ އަހަރުން ފެށިގެން ތެރަޕިޔުޓިކް ހިދުމަތްތަކަށް ސަރުކާރުގެ ހިލޭ އެހީ ލިބޭނެ ހިދުމަތް ތައާރަފުކުރެވުނު ނަމަވެސް، މިދިޔަ އަހަރެއްހާ ދުވަހުގެ ތެރޭގައި ނުކުޅެދުންތެރިކަން ހުންނަ ކުދިންނަށް ދޭންޖެހޭ ތެރަޕީ ފީ ސަރުކާރުން ދެމުން ގޮސްފައި ނުވާ ކަމަށް މެންބަރު ވިދާޅުވިއެވެ. އަދި އޭގެ ސަބަބުން ތެރަޕީ ނެގުމަށް ދައްކަންޖެހޭ ފައިސާ، ނުކުޅެދުންތެރިކަން ހުންނަ ކުދިންގެ އާއިލާތަކުން އަމިއްލައަށް ހަރަދުކުރަންޖެހިފައިވާ ކަމުގެ ޝަކުވާތައް އިތުރުވަމުންދާ ކަމަށް މެންބަރު ފާހަގަކުރެއްވިއެވެ.

މީގެ އިތުރުން، ތެރަޕީ ސެންޓަރުތަކުގައި ކިޔު ދިގުވުމާއި، އަގު ބޮޑުވުމާއި، އެކަށީގެންވާ އަދަދަށް ތެރަޕިސްޓުން ރާއްޖޭގައި ނެތްކަން ފާހަގަކުރައްވާފައިވާއިރު، އޭގެ ސަބަބުން ތެރަޕީގެ ފަރުވާ ބޭނުންވާ ކުދިންނަށް ކޮންމެހެން ބޭނުންވާ ފަރުވާއިން މަހުރޫމުވަމުންދާކަމަށް ވިދާޅުވެފައިވެއެވެ. އަދި މިއީ އެފަދަ ކުދިންގެ އާއިލާތަކުގެ ކަންބޮޑުވުން އޮތް ކަމެއް ކަމަށްވެސް ވިދާޅުވިއެވެ.

އެހެންކަމުން، މިކަން ސަރުކާރުގެ ސަމާލުކަމަށް ގެނެސް މި މައްސަލަތައް ހައްލުކުރުމަށް ހުރި ގޮންޖެހުންތައް ދެނެގަނެ، އެ ގޮންޖެހުންތައް ނައްތާލައި މުޖުތަމައުގައި ހާއްސަ އަޅާލުމާއި ރައްކާތެރިކަން ބޭނުންވާ ފަރާތްތަކަށް އެކަށީގެންވާ ހިދުމަތާއި އެހީތެރިކަން ލިބިދިނުމަށް ކުރަންޖެހޭ ކަންކަން ކުރުމަށް މެންބަރު ވަނީ ގޮވާލާފައްވާފަ އެވެ.