މިއަހަރުގެ މާރިޗު މަހުގެ ނިޔަލަށް، މާލެ ސަރަޙައްދުގައި 492 ފަރުދުން ދުންފަތުން ދުރުހެލިވުމަށް ފަރުވާ ހޯދާފައިވާކަން ޞިއްޙީ ވުޒާރާގެ ތަފާސްހިސާބުތަކުން ދައްކައިފިއެވެ.

ޞިއްޙީ ވުޒާރާއިން ޢާންމުކޮށްފައިވާ ތަފާސްހިސާބުތަކުން ދައްކާގޮތުގައި، މިއަހަރުގެ ޖަނަވަރީ މަހުން ފެށިގެން އޭޕްރީލް މަހުގެ ނިޔަލަށް، 492 ފަރާތަކުން ޓޮބޭކޯ ސެސޭޝަން ފަރުވާ ހޯދާފައިވެއެވެ.

މި ޚިދުމަތް އެންމެ ގިނައިން ހޯދާފައިވަނީ އިންދިރާ ގާންދީ މެމޯރިއަލް ހޮސްޕިޓަލުންނެވެ. އަދި ދުންފަތުން ދުރުހެލިވުމަށް ބޭނުންވާ ފަރާތްތަކަށް އާސަންދައިގެ ދަށުން ފަރުވާ ލިބޭނެ އިންތިޒާމު ވަނީ ހަމަޖައްސާފައެވެ.

Advertisement

ދުންފަތުގެ އިސްތިޢުމާލުން ދުރުހެލިވުމަށް އެދޭ ފަރާތްތަކަށް އެހީތެރިވުމުގެ ގޮތުން، މާލޭގައި 3 ހޮސްޕިޓަލަކުންނާއި ދަމަނަވެށިން ސެސޭޝަންގެ ޚިދުމަތް ފޯރުކޮށްދެއެވެ. މީގެ އިތުރުން، އަތޮޅުތެރޭގެ 48 މަރުކަޒަކުން މި ޚިދުމަތް ލިބޭނެ އިންތިޒާމު ވަނީ ހަމަޖެހިފައެވެ.

އިންދިރާގާންދީ މެމޯރިއަލް ހޮަސްޕިޓަލް: 288

ހުޅުމާލޭ ހޮސްޕިޓަލް: 110

ދަމަނަވެށި: 74

އޭޑީކޭ: 20

ދުންފަތުގެ އިސްތިޢުމާލު މަދުކުރުމަށް ސަރުކާރުން އެކުލަވާލާފައިވާ ޕްލޭންގެ ދަށުން، ފާއިތުވި މުއްދަތުގައި ގިނަގުނަ ފިޔަވަޅުތަކެއް ވަނީ އަޅާފައެވެ. މީގެ ތެރޭގައި، ދުންފަތް ކޮންޓްރޯލުކުރުމާބެހޭ ޤާނޫނާއި، އެކްސްޕޯޓް އިމްޕޯޓް ޤާނޫނަށް އިޞްލާޙު ގެނައުމާއެކު، ވޭޕްކުރުމަށް ބޭނުންކުރާ އިލެކްޓްރޯނިކް ވަސީލަތްތަކުގެ އިމްޕޯޓް ޑިއުޓީއަށް މުހިންމު ބަދަލުތަކެއް ގެނެސްފައިވެއެވެ.

މީގެ އިތުރުން، 2007 އިން ފެށިގެން އުފަންވާ ކުދިންނަށް ސިނގިރޭޓު މަނާކުރުމަށްޓަކައި 'ޖެނެރޭޝަނަލް ބޭން' އެއް ތަންފީޛުކުރުމަށް ވެސް ވަނީ ނިންމާފައެވެ. ދުންފަތް ކޮންޓްރޯލުކުރުމާބެހޭ ޤާނޫނުގެ ދަށުން، ދުންފަތުގެ ބާވަތްތައް ރާއްޖޭގައި އުފެއްދުމަކީ މަނާކަމެކެވެ. އަދި މިފަދަ ތަކެތި ރާއްޖެއަށް އެތެރެކުރުން ވެސް ވަނީ މަނާކޮށްފައެވެ.