މަޖީދިއްޔާ ސުކޫލްކީ ރާއްޖޭގެ ނިޒާމީ ތައުލީމުގެ އުނގު ކަމަށާ އެއީ މި ގައުމުގެ އެންމެ ޝަރަފްވެރި އިލްމީ ބަގީޗާ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މިހެން ވިދާޅުވީ މަޖީދިއްޔާ ސުކޫލަށް 98 އަހަރު ފުރުމުގެ މުނާސަބަތުގައި އެކްސްގައި ކުރެއްވި ޕޯސްޓެއްގަ އެވެ.

އެމަނިކުފާނު ވިދާޅުވީ މަޖީދިއްޔާގެ "ފަޚުރުވެރި ހިޔަލުން" މި ގައުމަށް ގެނުވި ކުރިއެރުމާއި، "މަޖީދިއްޔަ ނޫރުން" މި ގައުމަށް ދިން އިލްމީ އަލިކަމުގެ ހަނދާންތަކަށް ނިމުމެއް ނެތް ކަމަށެވެ.

Advertisement

އަދި ވިދާޅުވީ މަޖީދިއްޔާއަކީ ދިވެހިރާއްޖޭގެ ނިޒާމީ ތައުލީމުގެ އުނގު ކަމަށެވެ. އެއީ މި ގައުމުގެ އެންމެ ޝަރަފްވެރި "އިލްމީ ބަގީޗާ" ކަޖް ފާހަގަ ކުރައްވާ ރައީސް އިތުރަށް ވިދާޅުވީ މަޖީދިއްޔާގެ ހަނދާންތައް ދިވެހި ތާރީޚުގަައި ބިންވަޅު ނެގިފައިވަނީ ފަނޑުވުމެއްނެތް ޒިކުރާތަކާ އެކު ކަމަށެވެ.

”ދިވެހިރާއްޖޭގެ ތައުލީމުގެ އެންމެ ނަންހުރި ބިނާއަށް 98 އަހަރު ފުރޭ މި ތާރީޚީ މުނާސަބާގެ ހެޔޮއެދުންތައް ސްކޫލުގެ އެހާރާ މިހާރުގެ ދަރިވަރުންނަށް، ބެލެނިވެރީންނަށް، މުދައްރިސުންނަށް، ހިންގުންތެރީންނަށް، ޚިދުމަތްތެރީންނަށް އަރިސްކުރަނީ ހިތުގެ ފުންމިނުގެ ލޯތްބާއި، ހެޔޮ ދުޢާތަކާ އެކު،” ރައީސްގެ ޕޯސްޓްގައި ވިދާޅުވެފައިވެ އެވެ.

އަދި އެ ޕޯސްޓްގައި މަޖީދިއްޔާ ސުކޫލުގެ ލަވަ ހިމަނުއްވާފައިވެ އެވެ.

"މަޖީދީ މަޖީދީ ފަޚުރުވެރި ހިޔާ، މަޖީދިއްޔަ ނޫރުން ތަނަށް އަލިކުރާ، ފުރާށޭ ދަރީން ހިތް ޢުލޫމުން މިތާ، ކުރާށޭ ފިދާ ޖާނު ވަޠަނަށްޓަކައި، މި މަތިވެރި ޢިލްމީ ޢިމާރާތްތަކަށް އެދޭނީ ޙަޔާތާ އުޖާލާ ކަމަށް،"

މަޖީދިއްޔާއަށް 2027 ވަނަ އަހަރު 100 އަހަރު ފުރޭނެ އެވެ. އެ މުނާސަބާ ވަރަށް ކުލަގަދަ ކޮށް ފާހަގަ ކުރުމަށް ދަނީ ތައްޔާރު ވަމުންނެވެ. އެ ހަރަކާތްތައް މިހާރު ވަނީ ރަސްމީކޮށް ފަށާފަ އެވެ.