ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މީސްމީޑިއާގެ ޕްލެޓްފޯމެއް ކަމުގައިވާ "ވަޓްސްއެޕް" ގެ ރަސްމީ ޗެނަލެއް އުފައްދަވައި އާއްމުންނަށް މަޢުލޫމާތު ހިއްސާކުރައްވަން ފައްޓަވައިފި އެވެ.
މީސްމީޑިއާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރެއްވި ޕޯސްޓުގައި ވަނީ ވަޓްސްއެޕް ޗެނަލާ ގުޅުމަށް އެންމެހާ ރައްޔިތުނަށް ދައުވަތު ދެއްވައިފަ އެވެ. އެމަނިކުފާނުގެ ވަޓްސްއަޕް ޗެނަލް މެދުވެރިކޮށް ދުވަހުގެ އަދާހަމައިގެ އިތުރުން މުހިއްމު މައުލޫމާތާއި މެސެޖު ފޯރުކޮށްދެއްވާނެ ކަމަށް ރައީސް ވިދާޅުވެއެވެ.
މި ވަޓްސްއަޕް ޗެނަލްގެ އިތުރުން ރައީސް ގެންދަވަނީ ރައްޔިތުންނާއި ވީހާވެސް ގާތުން މައުލޫމާތު ހިއްސާ ކުރައްވަން އެހެނިހެން ޕްލެޓްފޯމްތައް މެދުވެރިކޮށްވެސް ރައްޔިތުންނާ ގާތުން މައުލޫމާތު ހިއްސާ ކުރައްވަމުންނެވެ.
އެގޮތުން ކޮންމެ ބުރާސްފަތި ދުވަހަކު "ރައްޔިތުންނާ އެކު" ނަމުގައި ގެނެސްދޭ ޕޮޑްކާސްޓް މެދުވެރިކޮށް ގިނަ މައުލޫމާތުތަކެއް ހިއްސާކުރައްވައެވެ. އަދި، "ރައީސްގެ ޖަވާބު" ނަމުގައި އާއްމުންގެ ސުވާލުތަކަށް ރައީސް ގެންދަވަނީ ޖަވާބުދެއްވަމުންނެވެ.
ޕޮޑްކާސްޓުގެ ހަތަރުވަނަ އެޕިސޯޑުގައި ވާހަކަފުޅު ދައްކަވަމުން އެމަނިކުފާނު ވިދާޅުވީ، ރައްޔިތުންނާ ވީހާވެސް ގާތުން މައުލޫމާތު ހިއްސާކުރެއްވުމަކީ އެމަނިކުފާނު ހާއްސަ އިސްކަމެއްދެއްވާ ކަމެއް ކަމަށެވެ.
Advertisement
This content is created and paid for by advertisers and does not involve Voice Journalists
