ބ. ފެހެންދޫގައި މޫނުވިނަ އާލާކުރުމުގެ މަޝްރޫއުއެއް މިއަދު ފަށައިފި އެވެ.
މިއީ ފްލޯޓިންގް އޭކާސް ނަމަކަށް ކިޔާ އަމިއްލަ ކުންފުންޏަކުން ހިންގާ މަޝްރޫއު އެކެވެ. މިއަދު ފެހެންދޫ ގައި އޮތް ރަސްމިއްޔާތެއް ގައި އެ މަޝްރޫއު ރަސްމީކޮށް ފަށާފައި ފައްޓަވައި ދެއްވީ ފިޝަރީޒް މިނިސްޓަރު އަހްމަދު ޝިޔާމް އެވެ.
މި މަޝްރޫއު ފެށުމުގެ ކުރީން އަޖުމަ ބެލުމުގެ މަޝްރޫއުއެއް ވަނީ ހިންގާފަ އެވެ. ރާއްޖޭގައި އާލާކުރަން ނިންމާފައިވަނީ ކާތަކެތި ތައްޔާރުކުރުމާއި ބޭހާއި ކޮސްމެޓިކްސްގެ އެކި ބާވަތްތައް އުފެއްދުމަށް ބޭނުންކުރާ މޫދު ވިނައިގެ ބާވަތެކެވެ.
ފެހެންދޫގައި މޫނުވިނަ އާލާކުރުމުގެ މަޝްރޫއު ފެށުން -- ފޮޓޯ: ވޮއިސް
އަޖުމަބެލުމުގެ މަޝްރޫއު އިން މިއީ ރާއްޖޭގައި ކާމިޔާބުކަމާއެކު އާލާކުރެވިދާނެ ބާވަތެއްކަން ވަނީ އެނގިފަ އެވެ.
މިނިސްޓްރީން ބުނީ މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު, ކަނޑުގެ ވަސީލަތްތައް ބޭނުންކޮށްގެން އިގްތިސާދީ މަސައްކަތް ފުޅާކުރުމަށް ކަނޑައަޅާފައިވާ ސިޔާސަތު ތަންފީޒުކޮށް މެރިކަލްޗާ ސިނާއަތަކީ ދިވެހިންނަށް އިގްތިސާދީ ނަފާލިބޭ ސިނާއަތަކަށް ހެދުމަށް ކުރެވޭ މަސައްކަތުގެ ތެރެއިން ފެށި މަޝްރޫއު އެކެވެ.
މި މަޝްރޫއުގެ ސަބަބުން މެރިކަލްޗާ ދާއިރާގައި އިތުރު މަޝްރޫއުތައް ތަރައްގީ ކުރުމަށް މަގުފަހިވެގެންދާނެ ކަމަށް ވެސް ބުންޏެވެ.
ފެހެންދޫގައި މޫނުވިނަ އާލާކުރުމުގެ މަޝްރޫއު ފެށުން -- ފޮޓޯ: ވޮއިސް
މީގެ ނަތީޖާއެއްގެ ގޮތުން، ރަށުގައި ތިބެގެން ޒުވާނުންނާއި ކަނބަލުންނަށް އައު ވަޒީފާގެ ފުރުސަތުތައް ހުޅުވި، ގައުމުގެ އެކްސްޕޯޓް އާމްދަނީ އިތުރުވެ، ޒަމާނީ ޓެކްނޮލޮޖީ ރާއްޖެއަށް ތައާރަފުވެ، ދިވެހިންނަށް އައު ހުނަރުތައް ދަސްކުރުމުގެ ފުރުސަތު ލިބިގެންދާނެ ކަމަށް ވެސް މިނިސްޓްރީން ވަނީ ބުނެފަ އެވެ.
އަދި މިއީ ގައުމުގެ އިގްތިސާދީ އަދި އިޖްތިމާއީ ތަރައްގީއަށް މަގުފަހިކޮށްދޭނެ މުހިންމު ފިޔަވަޅެއް ކަމަށެވެ.
Advertisement
This content is created and paid for by advertisers and does not involve Voice Journalists
