ސިފައިންގެ ޤާބިލްކަން އިތުރުކުރުމަށް ރައީސް މުޢިއްޒު ކުރައްވާ މަސައްކަތުގެ ނަތީޖާ ފެންނަމުންދާ ކަމަށާ ރައީސްގެ މަސައްކަތްޕުޅާއިއެކު ރާއްޖެ ބެލެހެއްޓުމުގެ އަމިއްލަ ބާރު ސިފައިންނަށް ލިބޭނެ ކަމުގައި ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީ ވިދާޅުވެއްޖެއެވެ. 

ޙިލްމީ މިހެން ވިދާޅުވީ، 133 ވަނަ ސިފައިންގެ ދުވަހުގެ މުނާސަބަތުގައި ތަހުނިޔާ، ރައީސުލްޖުމްހޫރުއްޔާ އަދު ސިފައިންގެ އެންމެ މަތީ ވެރިޔާ ޑރ. މުޙައްމަދު މުޢިއްޒަށާއި، ދިފާޢީ ވަޒީރު ޣައްސާން މައުމޫނަށް އަދި ދިވެހި ސިފައިންނަށް ދަންނަވައި ފޮނުއްވި ވީޑިއޯ މެސެޖުގައެވެ. 

އެގޮތުން، ޙިލްމީ ވިދާޅުވީ، ދިވެހި ސިފައިންނަކީ، ދިވެހި ޤައުމު ދިފާޢު ކުރުމުގައި މަތިވެރި ޤުރުބާނީތަކެއް އަބަދުވެސް ވަމުން އަންނަ ބައެއް ކަމަށެވެ. އަދި ޤައުމަށް ދިމާވާ ކޮންމެ ބޮޑު ކާރިސާއެއްގައިވެސް ޚިދުމަތް ފޯރުކޮށްދީފައިވަނީ ދިވެހި ސިފައިން ކަމަށެވެ.

Advertisement

މިއާއެކު ޙިލްމީ ވިދާޅުވީ، ސިފައިންނަކީ ކޮށްފައިވާ ހުވާގެ މަތީގައި، ސާބިތުވެ ތިބެ، ރާއްޖޭގެ މިނިވަންކަން ދިފާޢު ކުރުމަށްޓަކައި 24 ގަޑި އިރު ތައްޔާރަށްތިބޭ ބައެއް ކަމަށެވެ. 

ސިފައިންގެ އަސްކަރީ ޤާބިލުކަން އިތުރު ކުރެއްވުމަށް ރައީސް ޑރ މުޢިއްޒު ގިނަގުނަ މަސައްކަތްތަކެއް ކުރައްވަމުން ގެންދަވާކަން ފާހަގަކުރައްވައި ޙިލްމީ އިތުރަށް ވިދާޅުވީ، އެ މަސައްކަތުގެ ނަތީޖާތައް މިހާރު ފެންނަމުންދާ ކަމަށެވެ. 

ދިވެހިރާއްޖޭގައި ސިފައިންގެ ޚިދުމަތް ފެށިފައިވަނީ 1892 އެޕްރީލު 21 ވަނަ ދުވަހުއެވެ.

ދިވެހި ސިފައިންގެ ޤާބިލްކަން އިތުރު ކުރެއްވުމަށް ސަރުކާރުން ކުރަމުންދާ މަސައްކަތުގެ ތެރެއިން، ދިވެހިރާއްޖޭގެ ކަނޑުގެ ސަރަހައްދު 24 ގަޑި އިރު ބެލެހެއްޓުމަށް އަންމޭންޑް އޭރިއަލް ކޮމްބެޓް ވެހިކަލް (ޔޫ.އޭ.ވީ) ވަނީ ރާއްޖެ ގެނެސް އޭގެ ބޭނުން ހިފަން ފަށާފައެވެ. އެ ދުއްވުމުގެ މަސައްކަތް ކުރަމުންދަނީ ދިވެހި ސިފައިންނެވެ.