ސައުތު ރީޖަނުގައި ކުރިއަށް ގެންދާ މަގުތައް ތަރައްގީ ކުރުމުގެ މަސައްކަތްތައް ކުރިޔަށް ގޮސްފައިވާ މިންގަނޑާއި، ކުރަމުންދާ މަސައްކަތްތައް އާރްޑީސީ އިން ހާމަކޮށްފިއެވެ.

ރޯޑް ޑެވެލޮޕްމަންޓް ކޯޕަރޭޝަން (އާރްޑީސީ) އިން ސައުތު ރީޖަންގެ ހަ ރަށެއްގައި ޒަމާނީ ފެންވަރަށް މަގުތައް ތަރައްގީކުރުމުގެ މަސައްކަތްތައް މިވަގުތު ހިންގަމުންދާ ކަމަށް އެ ކޯޕަރޭޝަނުން މައުލޫމާތު ދެއެވެ.

އެއީ، ތ. ތިމަރަފުށި، ލ. ގަން، ގއ. ކޮލަމާފުށި، ގއ. ވިލިނގިލި، ގދ. ތިނަދޫ އަދި ގދ. ދިއްދޫއެވެ. މިގޮތުން މިހާތަނަށް ހިއްސާކޮށްފައިވަނީ، ލ. ގަމާއި، ގއ. ކޮލަމާފުށި އަދި ގއ. ވިލިނގިލީގައި ކުރިޔައް ގެންދާ ޕްރޮޖެކްޓްތަކެވެ. 

އާރްޑީސީ އިން ހާމަކޮށްފައިވާ ގޮތުން ލ. ގަމުގައި 2022 ގެ ޑިސެމްބަރުން ފެށިގެން ހިންގަމުން ގެންދަނީ، ލ. ގަން ފޭސް 2 ސަރަހައްދީ މަގުގައި ސްޓޯމް ވޯޓަރ ޖަންކްޝަން ބެހެއްޓުމުގެ މަސައްކަތާއި، އެ މަގު ކޮނުމާއި، ބެކް ފިލިންގެ މަސައްކަތްތަކެވެ. މިހާތަނަށް މި މަސައްކަތުގެ ނިމިފައިވަނީ 28 އިންސައްތައެވެ.

ގއ. ކޮލަމާފުށީގައި ކުރިޔަށްގެންދަނީ ދަންނަ އާދަމް ސައީދު މަގުގައި ދުވާރުގެ މަސައްކަތާއި، ތުއްތު ކަތީން މަގުގައި ކީވޯލްގެ މަސައްކަތެވެ. މި މަސައްކަތްތައް 2022 ގެ ޖެނުއަރީގައި ފެށިފައި ވީއިރު މިހާތަނަށް 73 އިންސައްތަ މަސައްކަތް ވަނީ ނިމިފައެވެ.

އަދި ހަމަ މިގޮތުން ގއ. ވިލިނގިލީގައި 2022 ވަނަ އަހަރުގެ އޭޕްރިލް އިން ފެނިގެން ކުރިޔަށް ގެންދާ ކަމަށް ބުނެފައިވަނީ ކުދެކަތިބެއްޔާ މަގުގައި ދުވާރުގެ މަސައްކަތާއި، މޫސާ މަގުގައި ކޯނަރ ކާރބް ސްޓޯން ޖެހުމުގެ މަސައްކަތެވެ. މި މަސައްކަތުގެ 73 އިންސައްތަ ވަނީ ނިމިފައެވެ.

ސައުތު ރީޖަނުގައި ކުރިޔަށް ގެންދަމުންދާ މަގުތައް ތަރައްގީކުރުމުގެ މަޝްރޫއުގެ މަސައްކަތްތައް ވަރަށް އަވަސްބާރުމިނެއްގައި ކުރަމުންދާ ކަމަށް ވެސް އާރްޑީސީން ވަނީ ބުނެފައެވެ.