ބަންކަރިންގެ ޚިދުމަތް ނުހުއްޓޭ ކަމަށާ އެކަމުން ފައިދާވެސް ވަމުންދާ ކަމަށް އިޤްތިޞާދީ ތަރައްގީއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
އިޤްތިޞާދީ ތަރައްގީއާ ބެހޭ ވުޒާަރާއިން މިއަދު ބޭއްވި ނޫސްވެރިންވެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބުދެއްވަމުން ސަޢީދު ވިދާޅުވީ، ބަންކަރިންގެ ޚިދުމަތް ސަރުކާރުން ފަށާފައިވަނީ މިދިޔަ އަހަރުގެ ސެޕްޓެމްބަރު މަހުގެ ތެރޭގައި ކަމަށެވެ. އަދި އޭގަފަހުން މި ވޭތުވެދިޔަ މަސްތަކުގެ ތެރޭގައި އެ މަޝްރޫޢުގެ މަސައްކަތް އެސްޓީއޯއިން ކުރަމުންދާ ކަމަށެވެ.
އެކަން އެއްވެސް އިރެއްގައި ހުއްޓާލާފައެއް ނެތް. ބަންކަރިންގެ މަސައްކަތް ހުއްޓާލާފައެއް ނެތް. ތެދުފުޅެއް، ބަންކަރިންގެ ޚިދުމަތް އަޅުގަނޑުމެން ފެށީ އުތުރުގައި. އުތުރުގައި ޕޯޓް ތަރައްގީ ކުރުމުގެ މަސައްކަތްވެސް މިދަނީ އެކަމަށް ޝައުގުވެރިކަން ފާޅުކުރި ކުންފުންޏާ އެކުގައި، މަސައްކަތް ފިޒިކަލީ ފެށުމަށް ކުރަންޖެހޭ ހުރިހާ މަސައްކަތެއް ކުރަމުން ތައްޔާރު ވަމުން. މިނިސްޓްރީ ތެރޭގައި އެ މަސައްކަތް ކުރިއަށް އެބަދޭ.
ވަޒީރު މުޙައްމަދު ސަޢީދު
ސަޢީދު އިތުރަށް ވިދާޅުވީ، ބަންކަރިންގ އަކީ ދުނިޔޭގެ ވަރަށް ބޮޑު ވިޔަފާރިއެއް ކަމަށެވެ. އެއީ އެތައް މިލިއަން ޑޮލަރެއްގެ މަސައްކަތަށް ވާއިރު، އޭގެ ތެރެއިން އެންމެ އިންސައްތަ އަކީވެސް 400 އެއްހާ މިލިއަން ޑޮލަރު ކަން ސަޢީދު ފާހަގަކުރެއްވިއެވެ. އަދި ރާއްޖޭއިން މަސައްކަތް ކުރަނީ އެ ”ޓާގެޓަށް“ މަސައްކަތް ކުރުމަށް ކަމަށްވެސް ވިދާޅުވިއެވެ. އެހެން ނަމަވެސް، އެ މަޝްރޫޢު ފަށާއިރަށް 400 މިލިއަން ލިބޭނެ ކަމަށް މީގެ ކުރިންވެސް އަދި މިހާރުވެސް ވިދާޅު ނުވާ ކަމަށް އޭނާ ވިދާޅުވިއެވެ.
ސަޢީދު ވިދާޅުވީ، ބަންކަރިންގެ މަސައްކަތް ކުރިއަށް ގެންދިޔުމަށް ރާއްޖޭގެ އުތުރުގައި އޮފް ޕޯޓް ޒޯނެއް ގާއިމް ކުރެވިފައިވާ ކަމަށާ، ބަނދަރެއް ނެތި ކަނޑުގައި، ޒޯނެއް އެފަދައިން ގާއިމް ކުރެވިފައިވަނީ، އެންމެ ދުވަހެއްވެސް ބަންކަރިންގެ ޚިދުމަތް ނުދީ މަޑުޖައްސާލަން ނޭދޭތީ ކަމަށެވެ.
އަދި ބަންކަރިންގެ ޚިދުމަތް ކުރިއަށް ގެންދަނީ އެސްޓީއޯއާ ގުޅިގެން ކަމަށްވާއިރު، އެ މަޝްރޫޢުއިން މިހާތަނަށް ފައިދާވީ މިންވަރު އެ ކުންފުނީގެ ހިސާބުތަކުން އެނގޭނެ ކަމަށް ސަޢީދު ވިދާޅުވިއެވެ.
އުއްމީދީ ރަނގަޅު ނަތީޖާއެއް ލިބެމުން އެބަދޭ. އަދި ޓާގެޓްކުރި ގޮތަށް މަސައްކަތް ކުރިއަރައި އެބަދޭ. އެކަމުން ލިބޭ ނަފާވެރިކަންވެސް ރަނގަޅު.
އިޤްތިޞާދީ ތަރައްގީއާ ބެހޭ ވަޒީރު މުޙައްމަދު ސަޢީދު
މީގެ އިތުރުން ސަޢީދު ވިދާޅުވީ، ބަންކަރިންގެ ޚިދުމަތްތަކާ ގުޅޭ ގޮތުން، އެސްޓީއޯގެ އިތުރުން، ރާއްޖޭގެ އެ ޚިދުމަތް ފޯރުކޮށްދޭ އެހެން ކުންފުނިތަކާއެކުވެސް މަޝްވަރަާ ކުރައްވަމުންދާ ކަމަށެވެ. އެހެން ކަމުން، ޕޯޓެއް ނެތް ނަމަވެސް އެ މަސައްކަތް ހުއްޓުމެއްނެތި ކުރިއަށްދާ ކަމަށް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
