ކުރީގެ ރައީސް މުހައްމަދު ނަޝީދުގެ މައްޗަށް ދުއާ ކުރެވުނީ އެމަނިކުފާނު ކުރެއްވި ކަމަައި ގުޅިގެން ޖަޒުބާތުގައި ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ އެކްސްގައި މީހަކު ކުރި ސުވާލަކާއި ގުޅިގެން އޭނައަށް ދެއްވި ޖަވާބުގަ އެވެ. އޭނާ އެ ސުވާލު ކުރީ މިނިސްޓަރު އެކްސްގައި ކުރެއްވި ޕޯސްޓަކާއި ގުޅިގެންނެވެ.

މިނިސްޓަރު ޝަހީމް ކުރެެއްވި ޕޯސްޓްގައި ވިދާޅުވީ ރާއްޖޭގެ ރައީސުލްޖުމުހޫރިއްޔާގެ މަގާމުގައި ހުންނަވާ އެއްވެސް ބޭފުޅަކަށް ޒާތީގޮތުން ދިމާކޮށް، އެބޭފުޅަކާއި އަނބިދަރިންގެ އަބުރާ ކަރާތަށް އުނިކަން އަންނަގޮތައް އަމަލުކުރުމަކީ ބަލައިގަނެވޭނެ ކަމެއް ނޫން ކަމަށެވެ. މިކަންކުރާ މީހުން އެކަން ހުއްޓާލަންޖެހޭ ކަމަށް ވެސް ވިދާޅުވި އެވެ.

Advertisement

އެ ޕޯސްޓާއި ގުޅިގެން ނަޝީދުގެ ވަރަށް ބޮޑު ސަޕޯޓަރެއް ކަމަށްވާ މޯލްޑިވިއަންގެ ކުރީގެ ޑީއެމްޑީ އައިޝަތު ޖެނީފާ ވަނީ "ރައީސް ނަޝީދުގެ މައްޗަށް ކުއްތާއެއް ފާކުރެއްވުން އެދި ދުއާ ކުރެއްވީ" ކާކުތޯ ސުވާލު ކޮށްފަ އެވެ.

މިނިސްޓަރު ވަނީ އެ ސުވާލަށް ޖަވާބު ދެއްވާ އެކަން ހިނގާ ދިޔަ ގޮތް ސާފުކޮށް ދެއްވާފަ އެވެ. މިނިސްޓަރު ވިދާޅުވީ އެއީ އެމަނިކުފާނާއިމެދު ރައީސް ނަޝީދު ކުރެއްވި ކަމަކާއި ގުޅިގެން ޖަޒުބާތުގައި ވިދާޅުވެވުނު ބަހެއް ކަމަށެވެ. ނަމަވެސް 2013 ވަނަ އަހަރު އެކަމާއި ގުޅިގެން ރައީސް ނަޝީދުގެ އަރިހުން މާފަށް އެދިވަޑައިގެން އެކަމާއި ގުޅޭގޮތުން ވާހަކަ ދައްކާފައިވާ ކަމަށެވެ.

އަދި ދެ ބޭފުޅުންނަށް ވެސް ކުރެެއްވުނު ކަންކަމާއި ގުޅިިގެން އެއް ބޭފުޅަކު އަނެއް ބޭފުޅަކަށް މާފު ކުރައްވާފައިވާ ކަމަށް ވިދާޅުވި އެވެ.

"އަޅުގަނޑު ރައީސް ނަޝީދަށް ވަރަށް އިހްތިރާމް ކުރަން. އެމަނިކުފާނު ވެސް އެފަދަ. ގާތްކަން ބާއްވާ," ޝަހީމް ވިދާޅުވި އެވެ.