ދިވެހި އަސްކަރިއްޔާއަށް ރައީސުލްޖުމްހޫރިއްޔާ ހޯއްދަވައި ދެއްވަނީ ހޯދަން މަޖުބޫރު ވަސީލަތްތަކެއް ކަމަށް ޑިފެންސް މިނިސްޓަރު މުހައްމަދު ޣައްސާން މައުމޫން މިރޭ ވިދާޅުވެއްޖެ އެވެ.

މިނިސްޓަރު މިހެން ވިދާޅުވީ މިރޭ ކަޅުތުއްކަލާ ކޮށީގައި އޮތް ދިވެހި ސިފައިންގެ 133 ވަނަ އަހަރީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުންނެވެ.

ރައީސް މުއިއްޒު ގެންދަވަނީ ވަރަށް ބޮޑު އިސްކަމެއް ދެއްވައިގެން އަސްކަރިއްޔާ ވަރުގަދަ ކުރުމަށް ޚާއްސަ މަސައްކަތްތަކެއް ކުރައްވަމުންނެވެ. އެ ގޮތުން ވައިގެ ފްލީޓެއް އުފައްދަވާ ޑްރޯން ފަދަ އެންމެ ޒަމާނީ ވަސީލަތްތައް ވަނީ ހޯއްދަވައި ދެއްވާފަ އެވެ. މީގެ އިތުރުން އެންމެ ޒަމާނީ އެއްގަމު އުޅަނދުތައް ވެސް ވަނީ ހޯއްދަވައި ދެއްވާފަ އެވެ.

Advertisement

އަސްކަރިއްޔާއަށް ހޯދާދީފައިވާ ބައެއް ވަސީލަތްތައް -- ފޮޓޯ: ވޮއިސް

މިނިސްޓަރު ވިދާޅުވީ އަސްކަރިއްޔާއަށް ރައީސުލްޖުމްހޫރިއްޔާ ހޯއްދަވައި ދެއްވަނީ ހޯދަން މަޖުބޫރު ވަސީލަތްތަކެއް ކަމަށެވެ. އެއީ ރާއްޖޭގެ މިނިވަން ކަމާއި އިސްތިގުލާލުގެ ދިފާއުގައި ކޮންމެހެން ހޯދަން ޖެހޭ ވަސީލަތްތަކެއް ކަމަށް ވެސް ވިދާޅުވި އެވެ.

ވަޔާއި ކަނޑުގެ މަގުން ރާއްޖެ ބެލެހެއްޓުން ވަރުގަދަ ކުރަން ޖެހޭކަން ފާހަަގަ ކުރައްވާ ޣައްސާން ވިދާޅުވީ މިނިވަން ކަމާއި ސިޔާދަށްބުރޫ އަރާފާނެ ފަދަ އަދި ދިވެހީންގެ ތެރޭގައި އޮތް އަމާންކަމާއި ހަމަޖެހުން ގެއްލޭނެ ފަދަ އެތައް ކަމެއް މިދިޔަ އަަހަރުތެރޭ ހިނގާފައިވާ ކަމަށެވެ.

އެފަދަ ނިރުބަވެރި ކަންކަމަށް ފުރުސަތު ބަންދު ކުރުމަށް ދިވެހި އަސްކަރިއްޔާގެ ގާބިލްކަން އިތުރުވާން ޖެހޭ ކަމަށް އެމަނިކުފާނު ވިދާޅުވި އެވެ.