"ހަށިހެޔޮކަމުގެ ކުލަ" ނަމުގައި ޝަރަފުގެ އާ ނިޝާނެއް ތައާރަފު ކޮށްފި އެވެ.

މި ކުލަ ތައާރަފު ކޮށްފައި ވަނީ މިރޭ އޮތް ސިފައިންގެ އަހަރީ ދުވަހުގެ ރަސްމީ ޖަލްސާގަ އެވެ.

އެމްއެންޑީއެފުން ބުނި ގޮތުގައި ޝަރަފުގެ މި ނިޝާނަކީ ހަށިހެޔޮކަމުގެ އަސާސީ މިންގަނޑުގެ އެންމެ މަތީ ފެންވަރުގައި ދަމަހައްޓާ ސިފައިންނަށް ދޭ ޝަރަފުގެ ނިޝާނެކެވެ. މިއީ ސިފައިންގެ ތެރޭގައި ހަށިހެޔޮކަމުގެ ފެންވަރު މަތީ ދަރަޖާގައި ހިފެހެއްޓުމަށް ހިތްވަރު ދިނުމަށާއި ހަށިހެޔޮކަމުގެ ފެންވަރު މަތީ ދަރަޖާގައި ހިފަހައްޓާ ސިފައިންގެ ހިތްވަރުގަދަ މަސައްކަތް ފާހަގަކުރުމުގެ ގޮތުން ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ، ޑރ. މުހައްމަދު މުއިއްޒު ނިންމެވި ނިންމެވުމެއް ކަމަށް ވެސް ބުންޏެވެ.

މި ކުލަ ތައާރަފު ކޮށްދެއްވީ ވެސް އެމަނިކުފާނެވެ.

ރައީސުލްޖުމްހޫރިއްޔާގެ މެޑެލި ހައްގުވާ 49 ފަރާތަކަށް މެޑެލި ހަވާލުކުރުން 

މިރޭގެ ރަސްމިއްޔާތުގައި އެމަނިކުފާނު ވަނީ ރައީސުލްޖުމްހޫރިއްޔާގެ މެޑެލި ހައްގުވާ 49 ފަރާތަކަށް މެޑެލި ހަވާލު ކޮށްދެއްވާފަ އެވެ. އަދި ފާއިތުވި އަހަރު ސިފައިންގެ ތެރެއިން އެންމެ ހަށިހެޔޮ އަންހެން އަދި ފިރިހެން ސިފައިންގެ މީހާ އާއި އެންމެ ފިޓް ޔުނިޓް އިއުލާނުކޮށް އެ ފަރާތްތަކަށް ވަނީ ފިލާ ހަވާލުކޮށްދެއްވާފަ އެވެ.

އެންމެ ހަށިހެޔޮ އަންހެން ސިފައިންގެ މީހަކަށް ހޮވިފައިވަނީ ކްއާޓާ މާސްޓާ ސާވިސް ގެ ކޯޕްރަލް އައިޝަތު ނާޒްނީން

އެގޮތުން އެންމެ ހަށިހެޔޮ އަންހެން ސިފައިންގެ މީހަކަށް ހޮވިފައިވަނީ ކްއާޓާ މާސްޓާ ސާވިސް ގެ ކޯޕްރަލް އައިޝަތު ނާޒްނީން އެވެ.

އެންމެ ހަށިހެޔޮ ފިރިހެން ސިފައިންގެ މީހަކަށް ހޮވިފައިވަނީ ސްޓާފް ސާޖަންޓް ހުސެއިން ފަޒީލް ހާރޫން

އެންމެ ހަށިހެޔޮ ފިރިހެން ސިފައިންގެ މީހަކަށް ހޮވިފައިވަނީ މެރިން ޑިޕްލޯއިމެންޓް ޔުނިޓް 3 ގެ ސްޓާފް ސާޖަންޓް ހުސެއިން ފަޒީލް ހާރޫން އެވެ. އެންމެ ފިޓެސްޓް ޔުނިޓަކީ ސްޕެޝަލް ފޯސަސް އެވެ.