ސްޓެލްކޯގެ "މެރިޓް ބޭސްޑް އިންޖިނިއަރިން ސްކޮލާޝިޕް" އަށް ޝައުގުވެރިވާ ފަރާތްތަކަށް ހާއްސަކޮށްގެން މައުލޫމާތު ދިނުމުގެ ސެޝަންތަކެއް ބާއްވާ ގޮތަށް ހަމަޖެހިއްޖެއެވެ. 

ސްޓެލްކޯއިން ބުނީ، މި ސްކޮލާޝިޕްތަކަށް ޝައުގޔވެރުވާ ފަރާަތްތަކަށް ޚާއްސަކޮށްގެން ބާއްވާ ވޯކް-އިން އިންފޮމޭޝަން ސެޝަންއެއް 24 އޭޕްރީލް 2025 ވާ ބުރާސްފަތި ދުވަހު ބޭއްވުމަށް ހަމަޖެހިފައިވާ ކަމަށެވެ.

އަދި އެ ދުވަހު ހެނދުނު 11:00 އިން 12:00 ބާއްވާ މި ސެޝަން އޮންނާނީ ސްޓެލްކޯގެ ޓްރެއިނިންގ ރޫމް (ފަސްވަނަ ފަންގިފިލާ)ގައި ކަމަށާ، މި ސެޝަންގައި މި ސްކޮލާޝިޕްތަކާއި ގުޅޭ ހުރިހާ މައުލޫމާތެއް ދެވިގެންދާނެ ކަމަށެވެ.

Advertisement

މީގެ އިތުރުން އޮންލައިން އިންފޮމޭޝަން ސެޝަންއެއް ހަމަ އެދުވަހު، 13:00 އިން 14:00 އަށް ބޭއްވުމަށްވެސް ހަމަޖެހިފައިވާ ކަމަށް އެ ކުންފުނިން ބުނެއެވެ.

އަދި އޮންލައިން ސެޝަންގައި ބައިވެރިވާން ބޭނުންވާ ފަރާތްތަކުން އެ ސެޝަންއަށް ރަޖިސްޓަރ ވުމަށް އެދި [email protected] އީމެއިލް ފޮނުވުމުން މީޓިންގ ލިންކު ހިއްސާކުރެވިގެންދާނެ ކަމަށްވެސް ބުންޏެވެ. 

'މެރިޓް ބޭސްޑް އިންޖިނިއަރިން ސްކޮލަޝިޕް ސްކީމް'ގެ ސްކީމްގެ ދަށުން ހުޅުވާލާފައިވާ ބެޗެލާސް ޑިގްރީ ފެންވަރުގެ ކޯސްތަކުގެ ތެރޭގައި ހިމެނެނީ:

އިލެކްޓްރިކަލް އަދި އިލެކްޓްރޯނިކް އިންޖިނިއަރިން ދާއިރާއިން އެއް ފުރުސަތު 

މެކޭނިކަލް އިންޖިނިއަރިން ދާއިރާއިން 2 ފުރުސަތު

މި ސްކޮލަޝިޕްތަކަށް 24 އަހަރުން ދަށުގެ، ހިސާބާއި ފިޒިކްސް ނުވަތަ ކެމިސްޓްރީ އާއި ކޮމްޕިއުޓަ ސައިންސް ހިމެނޭހެން އޭލެވެލްގައި ދެ 'އޭ ސްޓާ' އަދި އޭއެއް ހޯދާފައިވާ ދަރިވަރުންނަށް ނުވަތަ އެއާ އެއް ފެންވަރެއްގެ އައިބީ ސެޓްފިކެޓެއް އޮތް މީހުންނަށް ކުރިމަތިލެވޭނެ ކަމަށް އެ ކުންފުނިން ބުނެއެވެ. 

މި މަހުގެ ނިޔަލަށް ހުޅުވާލާފައިވާ މި ސްކޮލަޝިޕަށް ހޮވާ ދަރިވަރުންނަށް ކޯސް ފީ، އެސްޓަބްލިޝްމަންޓް އެލަވަންސް، ދިރިއުޅުމުގެ ހަރަދުތައް ހަމަޖައްސަން ބޭނުންވާ ފައިސާ، ދެކޮޅު ޓިކެޓ، ވިސާ ފީ އަދި ފޮތްތަކަށް ދޭ އެލަވަންސްވެސް ދިނުމަށް ވަނީ ހަމަޖެހިފައެވެ. 

ސްޓެލްކޯއިން ބުނީ ކޯސް ފެށުމުގެ ކުރިން ސްޓެލްކޯގައި އިންޓާންޝިޕެއް އަދި ކޯހަށް ފަހު ވެސް ސްޓެލްކޯގައި ހިދުމަތްކުރަން ޖެހޭނެ ކަމަށެވެ.