ރާއްޖޭގެ އެންމެ ހިތްގައިމު ތަނަކީ ހުޅުމާލޭއޭ ބުނުމަކީ ދޮގަކަށް ނުވާނެ އެވެ. ހުޅުމާލޭގެ އެންމެ ހިތްގައިމު އެއް ތަނަކީ ސެންޓަރަލް ޕާކޭ ބުނުމަކީ ވެސް އެންމެ ރަނގަޅު ބުނުމަކަށް ވާނެ އެވެ.
ހުޅުމާލެ އެ ހިތްގައިމު ކަމުގައި ބޭއްވުމަށް އެޗްޑީސީން ދަނީ ގިނަ މަސައްކަތްތަކެއް ކުރަމުންނެވެ. އެ ގޮތުން ސެންޓަރަލް ޕާކަކީ ކުޑަކުދީންނާއި އާއިލާތަކަށް ހިތްގައިމު މާހައުލަކަށް ހެދުމަށް އެޗްޑީސީން ވަރަށް ބޮޑު އިސްކަމެއް ދެ އެވެ.
މިއަދަކީ ދުނިޔޭގެ "އާތު ޑޭ" އެވެ. މި ދުވަހާއި ގުޅިގެން އެޗްޑީސީން ވަނީ ސެންޓަރަލް ޕާކުގެ ހިތްގައިމު ފޮޓޯތަކެއް ހިއްސާކޮށްފަ އެވެ. އެ ފޮޓޯތަކާ އެކު "ސެންޓަރަލް ޕާކުގައި މާތައް ފޮޅިފައި" މިހެން ކެޕްޝަން ކޮށްފައިވެ އެވެ.
ފޮޓޯތަކުން ފެންނަނީ ޕާކުގައިވާ ބައެއް ގަސްތަކުގައި މާތައް ފޮޅިިފައި ވަނިކޮށެވެ. ވަރަށް ގިނަ އަދަދަކަށް މާތައް ފަރިވެ ފޮޅިފައިވެ އެވެ.
އަދި ޕާކުގައިވާ ހިތްގައިމު ރީތި ބައެއް ގަސްތައް ވެސް ފޮޓޯތަކުން ފެނެ އެވެ. ބައެއް ފޮޓޯތަކުގައި އާއިލާތަކުން ގޮސް އުފާކުރާ މަންޒަރު ފެނެ އެވެ.
ހަފްތާ ބަންދުގައި އެންމެ ގިނަ ބަޔަކު ޒިޔާރަތް ކުރާ އެއް ތަނަކީ ސެންޓްރަލް ޕާކެވެ. އެތަނުގެ ހިތްގައިމުކަމުން އުފާ ހާސިލުކުރާ އާއިލާތައް ވަރަށް ގިނަ އެވެ. ހާއްސަކޮށް ކުޑަކުދީންނެވެ.
ކުރިއަށް އޮތީ ހަފްތާ ބަންދެވެ. ގަސްތުގައި މާތައް ފޮޅިފައި ވަނިކޮށް ސެންޓްރަލް ޕާކަށް ޒިޔާރަތްކޮށް ހަނދާނީ ފޮޓޯއެއް ނަގާލުން ކިހިނެތް ވާނެ ހެއްޔެވެ. އާއިލާއާއެކު ގޮސް ރީތި ފޮޓޯއެއް ނަގާލަން މިއީ ރަނގަޅު ފުރުސަތެކެވެ.
Advertisement
This content is created and paid for by advertisers and does not involve Voice Journalists
