ފުލުހުންގެ މުވައްސަސާއަށް މިސަރުކާރުގެ އެއްވެސް ވަޒީރަކު އަދި ރައީސް ޑރ މުޙައްމަދު މުޢިއްޒުވެސް ނުފޫޒް ނުފޯރުވާނެ ކަމަށް ދާޚިލީ ވަޒީރު ޢަލީ އިޙްސާން ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި ގަލޮޅު ދެކުނު ދާއިރާގެ މެންބަރު މީކާއިލް ނަސީމް ވަނީ ފުލުހުންގެ މުވައްސަސާގައި ތަހުގީގު ކުރެވެމުންދާ މައްސަލަތަކުގެ ތެރެއިން، ސަރުކާރާއި އާރާއި ބާރު ހުރި ފަރާތްތަކުން ފުލުހުންނަށް ނުފޫޒް ނުފޯރުވާކަން ކަށަވަރު ކުރެވެނީ ކިހާ ވަރަކަށްތޯ ސުވާލު ކުރައްވާފައެވެ.
އެ ސުވާލަށް ޖަވާބު ދެއްވަމުން އިހްސާން ވަނީ، މި ސަރުކާރުގެ އެއްވެސް ވަޒީރަކު ނުވަތަ، ރައީސުލްޖުމްހޫރިއްޔާވެސް ފުލުހުންގެ މުވައްސަސާއަށް ނުފޫޒް ނުފޯރުވާނެ ކަމަށެވެ.
މީގެ ކުރީގައި ހަނދުމަފުޅު ހުންނާނެ، ބައެއް ސަފާރީ ތަކުގައި ހިނގައިދިޔަ މައްސަލަތަކުގަޔާއި އެއްޗެހި. ކަންކަންކުރިއަށް ގެންދިޔަ ގޮތް. އަޅުގަނޑަށް ޔަގީންކޮށް، ކަށަވަރުކޮށް ބަޔާންކޮށް ދަންނަވަން އެނގެނީ މިހާރު އެފަދަ ކަމެއް ނުހިނގާނެ. ފުލުހުންގެ އިދާރާއަށް، ރައީސުލްޖުމްހޫރިއްޔާ ވެސް، އަދި ޚުދު އަޅުގަނޑުވެސް އަދި ދައުލަތުގެ އެއްވެސް ފަރާތަކުން ނުހަމަ އިންފުލުއެންސެއް ނުކުރާނެ. އެކަން އަޚުގަނޑުމެން ކަށަވަރު ކުރަން. އެއްވެސް ފުލުހުން ބަލަމުންގެންދާ މައްސަލައެއްގައި އަޅުގަނޑުމެން ގައިޑެއް ނުކުރާނަން، މިޔަނި ދިމާއަކަށް ދާން، މިޔަނި މީހަކު ދޫކޮށްލަން، މިޔަނި މީހަކު ހައްޔަރު ކުރަން
ވަޒީރު ޢަލީ އިޙްސާން
2020 ވަނައަހަރުގެ ޖޫން މަހުގެ 24 ވަނަ ދުވަހުގެ ރޭގައި، ހުޅުމާލޭ ފަޅުގައި އޮތް ސަފާރީއެއްގައި ބިދޭސީ އަންހެނަކު ރޭޕްކުރި މައްސަލައެއް ވަނީ ފެންމަތިވެފައެވެ.
މި ހާދިސާގައި އަންހެން މީހާ ރޭޕްކުރި ކަމަށް ތުހުމަތުވީ ސިޔާސީ ގޮތުން ނުފޫޒު ގަދަ ފަރާތްތަކެކެވެ. އޭގެ ތެރޭގައި، ހިންނަވަރުދާއިރާގެ ކުރީގެ މެންބަރު ޖީހާންގެ ފިރިކަލުންވެސް ހިމެނެއެވެ.
އެ މައްސަލައާއި ގުޅިގެން ހައްޔަރު ކުރި މީހުންގެ ވަނަވަރު ފުލުހުން އޭރު އާއްމު ނުކުރާއިރު، ހައްޔަރު ކުރުމަށްފަހު، ބަންދުކުރަން ކޯޓަށް ނުގޮސް، ފުލުހުންވަނީ އެމީހުން ދޫކޮށްލާފައެވެ. އަދި ދޫކޮށްލި ސަބަބެއް ކަމުގައި ފުލުހުން އޭރު ބުނީ "އެ ދެ މީހުން ދޫކޮށްލީ ތަހުގީގަށް ބަންދު ކޮށްފައި ބަހައްޓަންޖެހޭ ސަބަބެއް ނެތުމުން" ކަމަށެވެ.
އެ މަައްސަލާގައި އޭރުގެ ހޯމް މިނިސްޓަރު ޢިމްރާން ޢަބްދުاللهގެ އިތުބާރު ނެތް މައްސަލައެއްވެސް މަޖިލީހަށް ހުށަހެޅުނެވެ. ނަމަވެސް އެ މައްސަލަ އެމްޑީޕީ މެންބަރުން މަޖިލީހުން ބޭރުކޮށްލީއެވެ. މައްސަލައާއި ގުޅިގެން ފުލުހުންނަށް ގިނަ ފާޑުކިޔުންތަކެއް އަމާޒުވިއެވެ.
Advertisement
This content is created and paid for by advertisers and does not involve Voice Journalists
