ނުކުޅެދުންތެރިކަން ހުންނަ ކުދިންނަށް ބޭނުންވާ ތެރަޕިއުޓިކް ހިދުމަތްތައް ދެމުން އަންނަ ތަންތަނުގެ ފެންވަރު ބެލޭނެ ގޮތެއް އަދި މިހާތަނަށް ހަމަޖެހިފައި ނުވާކަމަށް މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓުން ހާމަކޮށްފިއެވެ.

ރައްޔިތުންގެ މަޖިލީހުގެ ޕެޓިޝަން ކޮމިޓީން މިއަދު ވަނީ، މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓް އަދި ނޭޝަނަލް ސޯޝަލް ޕްރޮޓެކްޝަން އޭޖެންސީގެ ބޭފުޅުން ހާޒިރުކޮށް، ސުވާލުކޮށްފައެވެ. އެފަރާތްތައް ކޮމިޓީއަށް ހާޒިރުކުރީ ނުކުޅެދުންތެރިކަން ހުންނަ ކުދިންނަށް ޤާނޫނީ ގޮތުން ލިބިދޭންޖެހޭ އިނާޔަތްތައް ލިބުމުގައި އިހުމާލުވެފައިވާތީ އެކަމާ ގުޅިގެން ޕެޓިޝަން ކޮމިޓީއަށް ހުށަހަޅާފައިވާ ޕެޓިޝަނާ ގުޅިގެންނެވެ.

މިއަދުގެ ކޮމިޓީގައި ތެރަޕިއުޓިކް ފަރުވާގެ ކަންކަމާއި މެމްބަރުން ކުރެއްވި ބައެއް ސުވާލުތަކަށް ޖަވާބުދެއްވަމުން ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީގެ ސްޓޭޓް މިނިސްޓަރު އަހުމަދު އާތިފް ވިދާޅުވީ، 2019 ވަނަ އަހަރުން ފެށިގެން ތެރަޕީތަކަށް ފައިސާ ދެމުން އާއިރު، އަދި މިހާތަނަށް މިކަމަށް ވަކި އުސޫލެއް އަދި ތެރަޕީތަކުގައި ވަކި ފެންވަރެއް ހުންނަންޖެހޭނެ ފަދަ މިންގަނޑުތަކެއް އެކުލަވާލެވިފައި ނުވާކަމަށެވެ. އެހެން ނަމަވެސް ހެލްތް މިނިސްޓްރީއާއެކު މިހާރު އެ މަސައްކަތް ކުރެވެމުން އަންނަކަމަށެވެ.

Advertisement

ނުކުޅެދުންތެރިކަން ހުންނަ ކުދިންނަށް ޤާނޫނީ ގޮތުން ލިބިދޭންޖެހޭ އިނާޔަތްތައް ލިބުމުގައި އިހުމާލުވެފައިވާކަމަށް ބުނެ ހުށަހެޅި ޕެޓިޝަނުގައިވެސް ވަނީ ތެރަޕީ ފަރުވާ ހޯދަމުންދާ ކުދިންނަށް ލިބޭ ފަރުވާގެ ފެންވަރާމެދު ބެލެނިވެރިންގެ ކަންބޮޑުވުން ހިއްސާކޮށްފައެވެ. މި ކޮމިޓީގައި ވާހަކަދައްކަވަމުން އާތިފް ވަނީ ބެލެނިވެރިން ފާހަގަކޮށްފައިވާ އެ ކަންބޮޑުވުމަކީ ވަރަށް މުހިއްމު ކަމެއްކަން ފާހަގަކުރައްވާފައެވެ. 

މިއަދުގެ ކޮމިޓީގައި ވާހަކަދައްކަވަމުން އެންސްޕާގެ ސީއީއޯ ހީނާ ވަލީދް ވިދާޅުވީ، 2019 ވަނަ އަހަރު ތެރަޕިއުޓިކް ފަރުވާގެ ކަންކަން ފެށިގެން އާއިރު ހިދުމަތްހޯދާ 119 ކުދިން ތިބިނަމަވެސް މިހާރު އެއަދަދު ވަރަށްބޮޑަށް އިތުރުވެފައިވާކަމަށެވެ. މިގޮތުން މިހާރު ތެރަޕިއުޓިކް ފަރުވާ ހޯދަމުން އަންނަ ކުދިންގެ އަދަދު 1،087 އަށް އަރާފައިވާކަމަށެވެ. ހީނާ ވިދާޅުވީ މިއަހަރުގެ ފުރަތަމަ ތިން މަސްދުވަހު އެކަނިވެސް ފަރުވާ ހޯދަމުން އަންނަ 675 ކުއްޖަކަށް 25 މިލިއަނަށްވުރެ ގިނަ ރުފިޔާ، ތެރަޕިއުޓިކް ފަރުވާއަށް ހޭދަކޮށްފައިވާކަމަށެވެ.

ރާއްޖޭގައި އޭޑީއެޗްޑީ އަދި ނުކުޅެދުންތެރިކަން ހުންނަ ކުދިންގެ އަދަދު އިތުރުވަމުން އަންނައިރު، ތެރަޕިއުޓިކް ފަރުވާގެ ހިދުމަތް ހޯދުމުގައި ގޮންޖެހުންތަކެއް ހުންނަކަމަށް އެފަދަ ކުދިންގެ ބެލެނިވެރިން ވަނީ ފާހަގަކޮށްފައެވެ. މިގޮތުން އެންމެ ބޮޑު ގޮންޖެހުމަކީ އަމިއްލަ ސެންޓަރުތަކުން ދެމުން އަންނަ ތެރަޕިއުޓިކް ފަރުވާގެ ހިދުމަތްތަކަށް ބޮޑު ހޭދައެއްކުރަންޖެހުންކަމަށް ބެލެނިވެރިން ބުނެއެވެ.