މާލޭގެ ގެއެއްގެ ފުރާޅުމައްޗަށް އަންހެން މީހާއަށް އިންސާފު ހޯދައިދޭން ގޮވާލާ މިރޭ މާލޭގައި އިހުތިޖާޖު ކޮށްފި އެވެ.

ގިނަ އަދަދެއްގެ ޒުވާނުން އެެއްވެ އިހުތިޖާޖު ކުރީ ހެންވޭރުގައި ހުންނަ ފުލުހުންގެ މަރުކަޒު ކައިރީގަ އެވެ. އެ މީހުން ތިބީ އަންހެން މީހާއަށް އިންސާފު ހޯދައިދޭން ގޮވާލާ ޝުއޫރުތައް ލިޔެފައިވާ ބޯޑްތައް ހިފައިގެންނެވެ. އަދި އެ މައްސަލަ އިންސާފުވެރި ކޮށް ބަލާ ތަހުގީގު އިންސާފުވެރި ކަމާއެކު ކުރިއަށް ގެންދަން ގޮވާލާފައިވެ އެވެ.

އިދިކޮޅު އެމްޑީޕީގެ ހަރަކާތްތަކުން ފެންނަ ބައެއް ޒުވާނުން ވެސް އިސްސަފުން ފެނުނު މި އިހުތިޖާޖުގެ ބައިވެރީން ވަނީ ޓްރާސްޕޯޓް މިނިސްޓަރު މުހައްމަދު އަމީންގެ އިސްތިއުފާއަށް ވެސް ގޮވާލާފަ އެވެ.

Advertisement

އަދި މި ހާދިސާ ތަހުގީގު ކުުރުމުގައި ފުލުހުން އަންހެން މީހާގެ ނަން ހާމަކުރުމާއި މައުލޫމާތު ހާމަކުރުމުގައި އިންސާފުން އެއްކިބާވެފައިވާކަން ފާހަގަކޮށްފައިވެ އެވެ.

މިރޭ އޮތް އިހްތިޖާޖުގެ ތެރެއިން -- ފޮޓޯ: ސަންގެ ފޮޓޯއެއް

މާލޭގެ ގެއެއްގެ ފުރާޅުމައްޗަށް އަންހެނަކު ވެއްޓުނު ހާދިސާއާ ގުޅޭ މުހިންމު ބައެއް މައުލޫމާތު ނޫސްވެރީންނާއި ހިއްސާކޮށް އެ ހާދިސާއާ ގުޅޭ ބައެއް މަންޒަރުތައް ރޭ ނޫސްވެރީންނަށް ވަނީ ދައްކާލާފަ އެވެ.

ނޫސްވެރީންނަށް މި މައުލޫމާތު ހިއްސާކޮށް ހާދިސާގެ ބައެއް މަންޒަރުތައް ހިއްސާކުރީ އިސްކަންދަރު ކޮށީގައި ރޭ އޮތް ބައްދަލްވުމެއްގަ އެވެ. މި ބައްދަލްވުމުގައި ފުލުހުން ފާހަގަކުރި ގޮތުގައި މި ހާދިސާގައި ހިމެނޭ އަންހެން މީހާއާ އޭނާއާއެކު އެ ރޭ އުޅުނު ފިރިހެން މީހާ މަސްތުވާތަކެއްޗަށް ވަނީ ޕޮޒިޓިވްވެފަ އެވެ. ފިރިހެން މީހާ ޕޮޒިޓިވްވީ މަސްތުވާތަކެތީގެ ބާވަތެއް ކަމަށްވާ ކެނެބިސްއަށެވެ.

އަންހެން މީހާ ވެއްޓުނު ހާދިސާ ހިނގީ އެރޭ ދަންވަރު 4:30 އާއި 5:00 އާ ދެމެދު އެވެ. ފުލުހުން ބުނާ ގޮތުގައި އަންހެން މީހާ ވައްޓާލި ކަމުގެ އެއްވެސް ހެއްކެތް ލިބިފައެއް ނުވެ އެވެ.

މި ހާދިސާގައި ފުރާޅު މައްޗަށް ވެއްޓިފައި ވަނީ އުމުރުން 21 އަހަރުގެ އަންހެނެކެވެ. ފުލުހުން ވަނީ އެ އަންހެން މީހާގެ ނަން ވެސް ހާމަކޮށްފަ އެވެ. އަންހެން މީހާގެ ނަމަކީ ހައްވާ ޔުމްނާ އެވެ.

އަންހެން މީހާ ފުރާޅު މައްޗަށް ވެއްޓިފައި އޮތްކަން ފުލުހަށް ރިޕޯޓް ކުރީ އާންމުންގެ މީހެކެވެ. އެ ރިޕޯޓް ލިބިފައި ވަނީ މި މަހުގެ 18 ވަނަ ދުވަހުގެ ހެނދުނު 7:23 ގައެވެ. އެމްއެންޑީއެފްގެ ރެސްކިއު ޓީމުގެ އެހީތެރިކަމާއެކު އަންހެން މީހާ ނެގިއިރު ވެސް ހަރަކާތް ހުރި ކަމަށް ފުލުހުން ބުނެ އެވެ.

އެއީ ކާކުކަން ދެނެގަތީ ފޭސް ރެކޮގްނިޝަން މެދުވެރިކޮށެވެ. ފުލުހަށް ހާދިސާގެ ރިޕޯޓް ލިބުނުތާ 30-45 މިނެޓާ ދެމެދު އެއީ ކާކުކަން ދެނެގެންފައިވެ އެވެ.