ޤާނޫނުގެ އިންސާފާއި ހަމަހަމަ ކަމަކީ ވަކި ފަންތިއަކަށް/ގިންތިއަކަށް ނުވަތަ ވަކި އާއިލާއަކަށް އަދި ފަރުދަކަށް ހާއްސަ އެއްޗެއް ނޫން ކަމަށް ހެންވޭރު ދެކުނު ދާއިރާގެ މެންބަރުން ޙުސައިން ޢިމްރާން ލަޠީފް ވިދާޅުވެއްޖެއެވެ.

އަންހެނަކު ގެއެެއްގެ ފުރާޅުމައްޗަށް ވެއްޓިފައި އޮއްވާ ފެނުނު ހާދިސާގައި، އެ އަންހެން މީހާއަށް އިންސާފު ހޯދައިދިނުމަށް ގޮވާލައި ރޭގައި މާލޭގެ މަގުތަކުގައި އާއްމުން މުޒާހަރާ ކޮށްފައިވާއިރު، އެ މައްސަލައާއި ގުޅިގެން އެކްސްގައި ކުރެއްވި ޕޯސްޓެއްގައި ޢިމްރާން ވިދާޅުވީ، އެއްވެސް އިންސާނެއް އެމީހެއްގެ ކޮއްކޮއަކަށް، ދައްތަ އަކަށް އަދި އެކުވެރިއަކަށް އިންސާފުން ބޭރު އަނިޔާއެއް ލިބުމަކަށް ނޭދޭނެ ކަމަށެވެ.

އަދި އެފަދަ ކަމެއް ދިމާވުމުން އޭގެ ހަޤީގަތް ހޯދައި އިންސާފު ހޯދުމަށް އެދޭނެ ކަމަށެވެ.

މިއާއެކު މި ވަގުތަކީ، މައްސަލައިގެ އެންމެ ނާޒުކު ވަގުތުކަން ފާހަގަކުރައްވައި، މި ވަގުތު ޤައުމުގެ ކަމާގުޅުންހުރި މުއައްސަސާތަކުން ކަން ކުރަމުންދާ ގޮތަކީ ރައްޔިތުން ނުހަނު ގާތުން ބަލަމުންދާނެ ކަންކަން ކަމަށް ވިދާޅުވިއެވެ. 

މާލޭގެ ގެއެއްގެ ފުރާޅުމައްޗަށް އަންހެނަކު ވެއްޓުނު ހާދިސާއާ ގުޅޭ މުހިންމު ބައެއް މައުލޫމާތު ނޫސްވެރީންނާއި ހިއްސާކޮށް ހާދިސާގެ ބައެއް މަންޒަރުތައް އިސްކަންދަރު ކޮށީގައި އިހަށް ރޭ އޮތް ބައްދަލްވުމެއްގައި ވަނީ ދައްކާލާފަ އެވެ.

މި ބައްދަލްވުމުގައި ފުލުހުން ފާހަގަކުރި ގޮތުގައި މި ހާދިސާގައި ހިމެނޭ އަންހެން މީހާއާ އޭނާއާއެކު އެ ރޭ އުޅުނު ފިރިހެން މީހާ މަސްތުވާތަކެއްޗަށް ވަނީ ޕޮޒިޓިވްވެފަ އެވެ. ފިރިހެން މީހާ ޕޮޒިޓިވްވީ މަސްތުވާތަކެތީގެ ބާވަތެއް ކަމަށްވާ ކެނެބިސްއަށެވެ

އަންހެން މީހާ ވެއްޓުނު ހާދިސާ ހިނގީ އެރޭ ދަންވަރު 4:30 އާއި 5:00 އާ ދެމެދު އެވެ. ފުލުހުން ބުނާ ގޮތުގައި އަންހެން މީހާ ވައްޓާލި ކަމުގެ އެއްވެސް ހެއްކެތް ލިބިފައެއް ނުވެ އެވެ.

މި ހާދިސާގައި ފުރާޅު މައްޗަށް ވެއްޓިފައި ވަނީ އުމުރުން 21 އަހަރުގެ އަންހެނެކެވެ. ފުލުހުން ވަނީ އެ އަންހެން މީހާގެ ނަން ވެސް ހާމަކޮށްފަ އެވެ. އަންހެން މީހާގެ ނަމަކީ ހައްވާ ޔުމްނާ އެވެ.

އަންހެން މީހާ ފުރާޅު މައްޗަށް ވެއްޓިފައި އޮތްކަން ފުލުހަށް ރިޕޯޓް ކުރީ އާންމުންގެ މީހެކެވެ. އެ ރިޕޯޓް ލިބިފައި ވަނީ މި މަހުގެ 18 ވަނަ ދުވަހުގެ ހެނދުނު 7:23 ގައެވެ. އެމްއެންޑީއެފްގެ ރެސްކިއު ޓީމުގެ އެހީތެރިކަމާއެކު އަންހެން މީހާ ނެގިއިރު ވެސް ހަރަކާތް ހުރި ކަމަށް ފުލުހުން ބުނެ އެވެ.

އެއީ ކާކުކަން ދެނެގަތީ ފޭސް ރެކޮގްނިޝަން މެދުވެރިކޮށެވެ. ފުލުހަށް ހާދިސާގެ ރިޕޯޓް ލިބުނުތާ 30-45 މިނެޓާ ދެމެދު އެއީ ކާކުކަން ދެނެގެންފައިވެ އެވެ.