މިދިޔަ ހުކުރު ދުވަހުގެ ހެނދުނުގެ ވަގުތެއްގައި މާލޭގެ ގެއެއްގެ ފުރާޅުމައްޗަށް 21 އަހަރުގެ އަންހެނެއް ވެއްޓިފައިއޮއްވާ ފެނިފައިވާ ހާދިސާއާ ގުޅިގެން އެއްވެސް މައުލޫމާތެއް ހާމަނުކޮށް އެތައް ދުވަހެއް ހޭދަކުުރުމަށް ފަހު އެޗްއާރުސީއެމުން ބަޔާނެއް ނެރެ އެ ކޮމިޝަންގެ ޒިންމާ އިން ރެކި އެހެން އިދާރާތައް ކުށްވެރި ކޮށްފި އެވެ.

އަބަދުވެސް ވަރަށް ބޮޑަށް ފާޑުކިޔުން އަމާޒުވާ އެޗްއާރުސީއެމުން ބަޔާނެއް ނެރެ ބުނީ އިދާރާތަކުން އަމަލުކުރަމުންދާ ގޮތް ތަހުގީގު ކުރަމުންދާ ކަމަށެވެ.

އަދި ބުނީ މި ހާދިސާ ތަހުގީގު ކުރުމުގައި ފުލުހުންގެ އިހުމާލުތަކެއްވާ ކަމަށް ބުނެ އަދި މި މައްސަލައިގައި ޝާމިލްވާ މީހުންނަކީ ދައުލަތުގެ އިސް ބޭފުޅުންނާއި ގުޅުންހުރި ބައެއް ކަމަށް ތުހުމަތުކޮށް މި މައްސަލައިގެ ތަހުގީގަށް ނުފޫޒު ފޯރުވަމުން ދާ ކަމަށް ބުނެ ބޮޑެތި ތުހުމަތުތަކެއް އާންމުން ސޯޝަލް މީޑިއާގައި ހިއްސާކޮށްފައި ވާތީ އެކަމަށް ބަލާނެ ކަމަށެވެ.

މި މައްސަލަ ކޮމިޝަންގެ ސަމާލުކަމަށް އައި ހިސާބުން އަނިޔާވި މީހާގެ އާއިލާގެ ބަހެއް ހޯދުމަށް ތަކުރާރުކޮށް މަސައްކަތް ކުރިމަމަށާ އާއިލާގެ ފަރާތުން މައުލޫމާތު ލިބިފައި ވަނީ މިއަދުގެ ވަގުތެއްގައި ކަމަށް ވެސް ބުންޏެވެ. އަދި ބުނީ އާއިލާގެ ފަރާތުން ފުލުހުންނާއި އެހެނިހެން އިދާރާތަކުގެ މަސައްކަތްތަކާމެދު ވެސް ކަންބޮޑުވުން ހިއްސާކޮށްފައިވާ ކަމަށެވެ.

މުޅި ބަޔާނުގައި އެ ކޮމިޝަނުން މަސައްކަތް ކުރީ ކޮމިޝަންގެ ޒިންމާ އަދާކުރާކަން ދެއްކުމާއި ފުލުހުންގެ މުއައްސަސާ އިން ހަދާފައިވާ ގޯސްތައް ހާމަކުރުމަށެވެ.

ޖިނާއީ ތަހުގީގެއްގެ އިނީޝިއަލް ސްޓޭޖެއްގައި އަދި ވަށައިގެންވާ ހުރިހާ ހެކިތައް ދެނެގަނެ، އެ ހެކިތައް ހޯދުމަށް މަސައްކަތް ކުރަމުންދާ މަރުހަލާގައި ލިބިފައިވާ ވަކި ހެކިތަކެއް އެކަނި އާންމު ކުރުމަކީ ތަހުގީގަށް އަސަރުކުރުމުގެ ފުރުސަތު އޮންނާނެ ކަމެއް ކަމަށާ އެގޮތުން ދިވެހި ފުލުހުން ބޭއްވި ނޫސްވެރިންގެ ބައްދަލުވުމުގައި، މައްސަލައިގައި އަނިޔާވި ފަރާތް އެންމެ ފަހުން ފެނިފައިވާ އިމާރާތާއި އިމާރާތުގެ ބޭރު ފެންނަ ސީސީޓީވީ ފެޓޭޖް އެކަނި ދައްކާފައިވުމަކީ ކޮމިޝަނުން ނުހަނު ކަންބޮޑުވާ ކަމެއް ކަމަށް ބުނެފައިވެ އެވެ.

އަދި ކުރީރޭ އޮތް ނޫސްވެރިންގެ ބައްދަލުވުމުގައި، މި ހާދިސާގައި އަނިޔާވި މީހާ ފިޔަވައި މައްސަލައާ ގުޅުންހުރި އެހެން މީހެއްގެ ނަމާއި މައުލޫމާތު ހާމަކޮށްފައިނުވާއިރު، ހަމައެކަނި މި ހާދިސާގައި އަނިޔާވި މީހާގެ މައުލޫމާތު ހާމަކޮށްފައިވުމަކީ، އަނިޔާވި މީހާއި ހާދިސާގައި ހިމެނޭ އެހެން މީހުން ތަފާތުކުރުން ކަމުގައި ބެލެވޭތީ މިއީ ވެސް ކޮމިޝަނުން ކަންބޮޑުވާ ކަމެއް ކަމަށް ވަނީ ބުނެފަ އެވެ. 

މި ހާދިސާގައި އަނިޔާވި މީހާއާ ފޮޓޯއާ ވީޑިއޯތައް އާންމުކުރާތާ އެތައް ދުވަހެއް ވީފަހުން ކޮމިޝަނުން ވަނީއެ ފޮޓޯއާއި ވީޑިއޯ ސޯޝަލް މީޑިއާގައި އެއްވެސް ބަޔަކު އާންމު ނުކުރުމަށް ވެސް އެދިފަ އެވެ.