އަންހެނަކު ފުރާޅުމައްޗަށް ވެއްޓުނު ހާދިސާއާ ގުޅިގެން ފުރުން މަނާކުރި މީހަކު މެލޭޝިޔާއަށް ހިނގައްޖެ ކަމަށް ބުނެ ފަތުރަނީ ދޮގެއް ކަމަށް ފުލުހުން ބުނެފި އެވެ.

މިދިޔަ ހުކުރު ދުވަހު ފަތިހު ހިނގި ހާދިސާގައި ގެއެއްގެ ނުވަވަނަ ފަންގިފިލާއިން އަންހެނަކު ވަނީ ވެއްޓިފަ އެވެ. އުމުރުން 21 އަހަރުގެ އެ އަންހެން މީހާ ވެއްޓި ޖެހުނީ ޖެހިގެން ހުރިގޭ ފުރާޅު މަައްޗަށެވެ.

އެ ހާދިސާއާ ގުޅިގެން ފުލުހުންގެ ބޮޑު ތަހުގީގެއް އެބަ ހިނގަ އެވެ. އެ ރޭގެ ހާދިސާގައި ބައިވެރިވުން އޮތް ކަމަށް ތުހުމަތުވާ އެންމެންގެ ޕާސްޕޯޓް ވަނީ ހިފަހައްޓާފަ އެވެ.

Advertisement

އޭގެ ތެރެއިން އަންހެނަކު މެލޭޝިޔާއަށް ފުރާފައިވާ ކަމަށް ބުނެ ބަޔަކު ދަނީ ވާހަކަތަކެއް ފަތުރަމުންނެވެ.

އެކަމާ ގުޅިގެން ފުލުހުން ބުނީ އަންހެނަކު ވެއްޓުނު ހާދިސާއާ ގުޅިގެން ފުރުން މަނާކޮށްފައިވާ އަންހެނަކު މެލޭޝިޔާއަށް ފުރާފައިވާ ކަމަށް ބުނެ ސޯޝަލް މީޑިއާގައި ދައުރުވަމުންދާ ވާހަކަތަކަކީ ހަގީގަތާ ހިލާފު ވާހަކައެއް ކަމަށެވެ.

މި ހާދިސާގައި ވެއްޓުނު އަންހެން މީހާއާއެކު އެންމެ ފަހު ވަގުތާ ހަމައަށް އުޅުނު ޒުވާން ފިރިހެން މީހާ ވަނީ ހައްޔަރު ކޮށްފަ އެވެ. 21 އަހަރުގެ އެ މީހާގެ އިތުރުން އެ ހާދިސާއާ ގުޅުން އޮތް ކަމަށް ތުހުމަތު ކުރެވޭ އެންމެންގެ ފޮޓޯއާ ވަނަވަރު ވަނީ އާންމު ކޮށްފަ އެވެ.