2025 އޭޕްރިލް 18 ވަނަ ދުވަހު ހ. މިޓާޒް ގޭގެ ފުރާޅު މައްޗަށް އަންހެނަކު ވެއްޓުނު މައްސަލައާ ގުޅިގެން ހައްޔަރު ކުރި ރައުދު އަޙްމަދު ޛިލާލްން 5 ދުވަހަށް ބަންދު ކުރުމަށް ކޯޓުން އަމުރު ކޮށްފިއެވެ.

ފުލުހުން ބުނީ ރައުދު ހައްޔަރު ކުރީ ކޯޓް އަމުރެއްގެ ދަށުން އިއްޔެ އިރުއޮއްސި 6:20 ހާއިރު ކަމަށެވެ.

ފުލުހުން އެންމެ ފުރަތަމަ ބުނި ގޮތުގައި ރައުދު ހައްޔަރުކޮށްފައިވަނީ ފުލުހުންގެ ތަހުގީގަށް އެއްބާރުލުން ނުދޭތީއެވެ. ނަމަވެސް ރައުދު ހައްޔަރު ކުރަން ފުލުހުން ކޯޓަށް ހުށަހެޅި ތުހުމަތުތަކުގައި އެހާދިސާގައި އޭނާގެ ބައިވެރިވުން އޮވެދާނެ ކަމަށް ވަނީ ތުހުމަތު ކޮށްފައެވެ.

Advertisement

އަދި ޔުމްނު ވެއްޓުމުގައި އޭނާގެ ބައިވެރިވުން އޮތް ކަމަށް ބެލެވޭ ކަމަށް ތުހުމަތުކުރެވޭއިރު އެ ހާދިސާ ހިނގި ވަގުތު އޭނާގެ މަސްތުގެ ހާލަތުގައި ހުރުމާއި ޖިންސީ ބޭނުންހިފުމުގެ ކުށަށް އަރައިގަތުމުގެ ތުހުމަތު ވެސް ފުލުހުން ވަނީ ކޮށްފައެވެ. 

ފުލުހުން އިއްޔެ މައުލޫމާތު ދިން ގޮތުގައި ރައުދުއާ އަންހެން މީހާ ހިމެނޭހެން އިތުރު ހަތް މީހެއްގެ ފޯނާއި ޕާސްޕޯޓް ވަނީ ހިފަހައްޓާފައެވެ.

މި މައްސަލައާ ގުޅިގެން ބައެއް ތަންތަން ވަނީ ބަލާ ފާސްކޮށްފަ އެވެ.