މ. މުލީ ގައި ތަރައްގީ ކޮށްފައިވާ އެއާޕޯޓް މަޝްރޫއު ނިމި މިއަދު ޓެސްޓް ފްލައިޓް ޖައްސައިފި އެވެ.
ކޮންސްޓްރަކްޝަން މިނިސްޓްރީން ބުނީ މުލި އެއާޕޯޓަށް ކާމިޔާބުކަމާއެކު ޓެސްޓް ފްލައިޓް ޖައްސާފައިވާ ކަމަށެވެ. ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި ފެށި މަޝްރޫއު ނިމި އެއާޕޯޓް ހުޅުވަން މިހާރު އޮތީ ތައްޔާރުވެފަ އެވެ.
ސަރުކާރުން ދަނީ މި މަހުގެ 31 ވަނަ ދުވަހު ނުވަތަ އަންނަ މަހުގެ ފުރަތަމަ ދުވަހު އެއާޕޯޓް ހުޅުވަން ތައްޔާރުވަމުންނެވެ.
މުލީ އެއާޕޯޓަށް ޓެސްޓް ފްލައިޓް ޖެއްސުން -- ފޮޓޯ: ކޮންސްޓްރަކްޝަން މިނިސްޓްރީ
ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވީ އެމަނިކުފާނު ބޭނުންފުޅުވެވަޑައިގަންނަވަނީ މި މަސް ނިމުމުގެ ކުރީން އެއާޕޯޓް ހުޅުވަން ކަމަށެވެ. 31 ވަަނަ ދުވަހު އެއާޕޯޓް ނުހުޅުވިއްޖެނަމަ އެންމެ ފަސް ވެގެން އަންނަ މަހުގެ ފުރަަތަމަ ދުވަހު އެއާޕޯޓް ހުޅުވާނެ ކަމަށެވެ.
މުލީ އެއަރޕޯޓުގެ އަމަލީ މަސައްކަތް 2021 ވަނަ އަހަރުގެ އޮގަސްޓްމަހު ފަށައި، 2023 ވަނަ އަހަރުގެ މެދުތެރޭގައި ޚިދުމަތްދޭން ރާވާފައި އޮތް ނަމަވެސް، އެކި ސަބަބުތަކާހުރެ އެއާޕޯޓުގެ މަސައްކަތްތައް ލަސްވީ އެވެ.
މިއީ މުލަކަ އަތޮޅުގައި ތަރައްގީ ކުރި ފުރަތަމަ އެއާޕޯޓެވެ. 1200 މީޓަރު ދިގު އަދި 30 މީޓާރު ފުޅާ ރަންވޭއަކާއެކު ތަރައްގީކޮށްފައިވާ މި އެއަޕޯޓުގެ މަޝްރޫއަށް ސަރުކާރުން 221 މިލިޔަން ރުފިޔާ ހަރަދުކޮށްފައިވެ އެވެ.
Advertisement
This content is created and paid for by advertisers and does not involve Voice Journalists
