2025 އޭޕްރިލް 18 ވަނަ ދުވަހު ހ. މިޓާޒް ގޭގެ ފުރާޅު މައްޗަށް ވެއްޓި އަނިޔާވި، ހައްވާ ޔުމްނު ރަޝީދު، އިތުރު ފަރުވާއަށް މެލޭޝިއާއަށް ފޮނުވާލުމުގެ ކަންކަން ސަރުކާރުން ހަމަޖައްސައިދީފައިވާ ކަމަށް އާއިލާއިން ބުނެފިއެވެ. 

ޔުމްނުގެ ޢާއިލާގެ ފަރާތުން އެ މައްސަލައާއި ގުޅޭ މައުލޫމާތު ހިއްސާ ކުރުމަށް ހާވާލުކޮށްފައިވާ ފަރާތް ކަމުގައިވާ މުއުމިން މައުމޫން ”ވޮއިސް“އަށް މައުލޫމާތު ދިން ގޮތުގައި، ޔުމްނު މެލޭޝިއާއަށް ފުރުވާލުމުގެ ހުރިހާ ކަމެއް ސަރުކާރުން ހަމަ ޖައްސައި އެންސްޕާގެ ކަންކަންވެސް މިހާރު ވަނީ ނިމިފައެވެ. 

އެގޮތުން އޭނާ ފުރުވާލުމަށް، ސަރުކާރުން އެއްބާރުލުން ލިބޭ ކަމަށާ އޭނާގެ ދަތުރުފަތުރުގެ ހަރަދާއި ބޭސް ފަރުވާއާ ހަވާލުވެފައިވަނީ ސަރުކާރުން ހަވާލުވެފައިވާ ކަމަށެވެ. 

"އެކަމަކު އެންމެ އަވަހަށް ވެސް ފުރެން އޮތީ މި މަހުގެ 28ގައި،" އޭނާ ބުންޏެވެ.

އެހެންކަމުން، ޗާޓަޑް ފްލައިޓެއްގައި ފުރުވާލެވޭތޯ ސަރުކާރުން މަސައްކަތް ކުރަމުންދާ ކަމަށާ އެކަން ހަމަޖެހިއްޖެ ނަމަ މާދަމާ ވެސް ފުރަން ޖެހިދާނެ ކަމަށްވެސް ބުންޏެވެ.

ޔުމްނު ފުރާޅު މައްޗަށް ވެއްޓިފައި އޮއްވާ ފެނުނު ހާދިސާއަށް ހަފްތާއެއް ވެފައިވާއިރު، އޭނާ ހޮސްޕިޓަލަށް ގެންގޮސް އެންމެ ކުރިން ފަރުވާ ދީފައިވަނީ ވެންޓިލޭޓަރުގައެވެ. ނަމަވެސް މިހާރު ވަނީ ވެންޓިލޭޓަރުން ނަގާފައިވާއިރު، ހާލު އަދިވެސް ސްޓޭބަލް ނުވާ ކަމަށް ފުލުހުން މައުލޫމާތު ދީފައިވެއެވެ.  

މި މައްސަލައާއި ގުޅިގެން، ޔުމްނު އާއި އެކު ފަހު ވަގުތާ ޖެހެންދެން އުޅުނު، ރައުދު އަހުމަދު ޒިލާލް އިއްޔެ ހައްޔަރުކޮށްފައިވާއިރު، ކޯޓުން ވަނީ އޭނާގެ ބަންދަށް 5 ދުވަސް ޖަހާފައެވެ.

އަދި މައްސަލާގައި ރައުދުގެ ހިމެނޭހެން 7 މީހެއްގެ ފޯނާއި ޕާސްޕޯޓްވަނީ ފުލުހުން ހިފަހައްޓާފައެވެ.