2025 އޭޕްރިލް 18 ވަނަ ދުވަހު ހ. މިޓާޒް ގޭގެ ފުރާޅު މައްޗަށް ވެއްޓި އަނިޔާވި، ހައްވާ ޔުމްނު ރަޝީދު، ކޮބައިތޯ އޭނާއާއެކު އުޅުނު ރައުދު އަހުމަދު ޒިލާލް ގާތު އެހުމުން، އޭނާ ވެއްޓުނީ ކަމަށް ރައުދު ބުނި ކަމަށް ފުލުހުން ބުނެފިއެވެ.

ޔުމްނު ވެއްޓުނު މައްސަލައާއި ގުޅިގެން ރައުދު ހައްޔަރު ކުރީ އިއްޔެގެ ވަގުތެއްގައެވެ. އެއަށްފަހު އޭނާގެ ބަންދާމެދު ގޮތެއް ނިންމުމަށް މިއަދު ކޯޓަށް ހާޒިރު ކޮށްފައިވާއިރު ކޯޓުން ވަނީ ބަންދަށް 5 ދުވަސް ޖަހާފައެވެ. 

އެގޮތުން، ކްރިމިނަލް ކޯޓުން ނެރުނު ބަންދު އަމުރުގައި، ފުލުހުން މީގެ ކުރިން ހާމަނުކުރާ މުހިންމު ވާހަކަތަކެއް ބަޔާންކޮށްފައިވާއިރު، އެ އަމުރުގައި ވާގޮތުން ޔުމްނުއާއި، ރައުދުއާ ދެމެދު އެ ރޭ ހަމަނުޖެހުންތަކެއް ހިނގައިފައިވާ ކަމަށް މައްސަލައިގެ އިންވެސްޓިގޭޝަން އޮފިސަރު (އައިއޯ) ވަނީ ބުނެފައެވެ.

އަދި ޔުމްނު ވެއްޓުމަށްފަހު މާ ގިނައިރެއް ނުވަނީސް، ޔުމްނު ކޮބައިތޯ ރައުދުއާ ސުވާލުކުރުމުން ”ވީ ތަނެއް ނޭނގޭ ކަމަށާއި، ވެއްޓުނީކަމަށް ބެލެވޭ ކަމަށް" ރައުދު ބުނި ކަމަށް ”މައުލޫމާތު ލިބިފައިވާކަމަށް އައިއޯ ފާހަގަކުރި“ ކަމަށް އަމުރުގައިވެއެވެ. 

ފުލުހުން އެންމެ ފުރަތަމަ ބުނި ގޮތުގައި ރައުދު ހައްޔަރުކޮށްފައިވަނީ ފުލުހުންގެ ތަހުގީގަށް އެއްބާރުލުން ނުދޭތީއެވެ. ނަމަވެސް ރައުދު ހައްޔަރު ކުރަން ފުލުހުން ކޯޓަށް ހުށަހެޅި ތުހުމަތުތަކުގައި އެހާދިސާގައި އޭނާގެ ބައިވެރިވުން އޮވެދާނެ ކަމަށް ވަނީ ތުހުމަތު ކޮށްފައިވާ ކަމަށް މައުލޫމާތު ލިބެއެވެ.

އަދި ޔުމްނު ވެއްޓުމުގައި އޭނާގެ ބައިވެރިވުން އޮތް ކަމަށް ބެލެވޭ ކަމަށް ތުހުމަތުކުރެވޭއިރު އެ ހާދިސާ ހިނގި ވަގުތު އޭނާގެ މަސްތުގެ ހާލަތުގައި ހުރުމާއި ޖިންސީ ބޭނުންހިފުމުގެ ކުށަށް އަރައިގަތުމުގެ ތުހުމަތު ވެސް ފުލުހުން ކޮށްފައިވާ ކަމަށް މައުލޫމާތު ލިބެއެވެ. 

ފުލުހުން އިއްޔެ މައުލޫމާތު ދިން ގޮތުގައި ރައުދުއާ އަންހެން މީހާ ހިމެނޭހެން އިތުރު ހަތް މީހެއްގެ ފޯނާއި ޕާސްޕޯޓް ވަނީ ހިފަހައްޓާފައެވެ.