އޭޕްރިލް 18 ވަނަ ދުވަހު ހ. މިޓާޒް ގޭގެ ފުރާޅު މައްޗަށް އަންހެނަކު ވެއްޓުނު މައްސަލައާ ގުޅިގެން ފޯނު ހިފެހެއްޓުމުގެ އަމުރު ނަގާފައިވާ އެންމެންގެ ފޯނު މިހާރު ވަނީ ފުލުހުންގެ ބެލުމުގެ ދަށަށް ގެނެސްފައި ކަމަށް ފުލުހުން ބުނެފި އެވެ.

ފުލުހުން އެކަން ވަނީ ޔަގީންކޮށްދީފަ އެވެ. ފުލުހުން ބުނީ މިޓާޒް ގޭގެ ފުރާޅު މައްޗަށް އަންހެނަކު ވެއްޓުނު މައްސަލައާ ގުޅިގެން ފޯނު ހިފެހެއްޓުމުގެ އަމުރު ނަގާފައިވާ އެންމެންގެ ފޯނު މިހާރު ވަނީ ފުލުހުންގެ ބެލުމުގެ ދަށަށް ގެނެސްފައި ކަމަށެވެ. އެއީ ޖުމުލަ 9 މީހެއްގެ ފޯނު ކަމަށް ބުންޏެވެ.

ހ. މިޓާޒް ގޭގެ ފުރާޅު މައްޗަށް ވެއްޓި އަނިޔާވި، ހައްވާ ޔުމްނު ރަޝީދު އެވެ. އޭނާއާ އެކު އޭގެ ކުރީން އުޅުނީ ރައުދު އަހުމަދު ޒިލާލް އެވެ. އެއީ އުމުރުން 21 އަހަރުގެ ދެ ޒުވާނުންނެވެ.

Advertisement

އެ މައްސަލާގައި ރައުދު ވަނީ ހައްޔަރުކޮށްފަ އެވެ. އަދި ބަންދުގެ މުއްދަތު ޖަހަން ކޯޓަށް ހާޒިރުކުރުމުން ފަސް ދުވަހުގެ ބަންދުގެ މުއްދަތެއް ވަނީ ޖަހާފަ އެވެ.

ފުލުހުން ކޯޓްގައި ބުނީ ތަހުގީގަށް އެެނގިފައިވާ ގޮތުގައި ރައުދު އާއި ޔުމްނު އާ މެދު ހަމަނުޖެހުމެއް އެ ރޭ ހިނގި ކަމަށެވެ. އަދި ޔުމްނު ވެއްޓުނު ހާދިސާއަށް ފަހު އޭގެ މާ ގިނައިރުތަކެއް ނުވަނީސް އޭނާ ކޮބައިތޯ ރައުދުއާ ސުވާލުކުރުމުން ވީތަނެއް ނޭންގޭ ކަމަށާ ވެއްޓުނީ ކަމަށް ބެލެވޭ ކަމަށް ބުނެފައިވާ ކަމަށެވެ. 

ކޯޓް އަމުރުގައި ވަނީ ރައުދު ބަންދުކުރަން އަމުރުދިން ސަބަބުތައް ތަފްސީލުކޮށް ހިމަނާފަ އެެވެ.