ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ބަލަމުންދާ މައްސަލަތަކާ ގުޅުންހުރި 17 އެއްގަމު އުޅަނދެއްގެ ވެރިފަރާތް އެވުޒާރާއަށް ހާޒިރުވުމަށް އަންގައިފިއެވެ.
އެވުޒާރާއިން، ދިވެހި ސަރުކާރުގެ ގެޒެޓުގައި ކުރި އިއުލާނެއްގައި ބުނެފައިވަނީ، އިއުލާނުގައި ބަޔާންކޮށްފައިވާ 17 އުޅަނދުގެ ވެރިފަރާތުން ކުރިއަށް އޮތް 7 ދުވަހުގެ ތެރޭގައި މިނިސްޓްރީއަށް ހާޒިރުވާން ޖެހޭނެކަމަށެވެ. އަދި އެއްވެސް ސަބަބަކާހުރެ މި މުއްދަތުގެ ތެރޭގައި މިނިސްޓްރީއަށް ހާޒިރުވާން އުޒުރުވެރިވާ ފަރާތްތަކުން [email protected] ، އަށް އެފަރާތެއްގެ ފޯނު ނަމްބަރު، އީމެއިލް އެޑްރެސް އަދި މިހާރު ދިރިއުޅޭ އެޑްރެސް އީމެއިލް ކުރުމަށްވެސް ވަނީ އަންގާފައިވެއެވެ.
ބަލަމުންދާ މައްސަލަތަކަށް ޖަވާބުދާރީވުމަށް ދީފައިވާ މުއްދަތުގެ ތެރޭގައި، ވެރިފަރާތްތަކުން އެވުޒާރާއަށް، ހާޒިރު ނުވެއްޖެނަމަ ނުވަތަ ހާޒިރު ނުވެވޭނެކަން ކަނޑައެޅިފައިވާ ގޮތަށް އަންގާފައިނުވާނަމަ، އުސޫލުތަކާއި އެއްގޮތްވާ ގޮތުތެމަތިން ފިޔަވަޅު އަޅާނެކަމަށްވެސް އެ ވުޒާރާއިން އެ އިއުލާނުގައި ބުނެފައިވެއެވެ.
ރައީސުލްޖުމްހުރިއްޔާ ޑރ. މުހައްމަދު މުޢިއްޒު ވެރިކަމާ ހަވާލުވެ ވަޑައިގެންއިރު، ޓްރާންސްޕޯޓް މިނިސްޓްރީގެ ހިދުމަތްތަކުގައި ގިނަ ކަންބޮޑުވުންތަކެއް ހުރިއެވެ. ވަކިން ހާއްސަކޮށް ހަތަރު ފުރަޅުލީ އުޅަނދުތައް ރަޖިސްޓްރީ ކުރުމުގައި އެއްވެސް ކަހަލަ އުސޫލެއްނެތި އެއްގަރާޖަކަށް އެތަކެއް އުޅަނދެއް ރަޖިސްޓްރީ ކުރުމުގެ މައްސަލަތަކާއި "ވަގު" ޑޮމައިންތަކުގެ މައްސަލަތައް ފާހަގަކުރެވެއެވެ. މިނިސްޓްރީން މިހާރު ގެންދަނީ އެ މައްސަލަތައް ބަލަމުންނެވެވ
އޮޑިޓަރ ޖެނެރަލް އެންމެފަހުން ނެރުއްވި ޓްރާންސްޕޯޓް މިނިސްޓްރީގެ އޮޑިޓް ރިޕޯޓްގައިވެސް ވަނީ އެއްގަމު އުޅަނދުތައް ރަޖިސްޓްރީކުރުމަށް ގެންގުޅެމުން އަންނަ އުސޫލުތައް ދޯހަޅިކަން ފާހަގަކުރައްވާފައެވެ. އެގޮތުން އެއްގަމާއި ކަނޑު އުޅަނދުފަހަރު ރަޖިސްޓްރީކުރުމަށް ބޭނުންކުރާ ސިސްޓަމްގެ ކޮންޓްރޯލްގައި މައްސަލަތައް ހުރުމުން، ސިސްޓަމްގެ ބޭނުން ނަހަމަ ގޮތުގައި ހިފައި، ޤަވާއިދާ ހިލާފަށް އުޅަނދު ރަޖިސްޓްރީކުރުމުގެ ފުރުސަތު ވަރަށްބޮޑަށް އޮތްކަން ވަނީ ފާހަގަކޮށްފައެވެ.
Advertisement
This content is created and paid for by advertisers and does not involve Voice Journalists
