ކޮމިޝަނަރ އޮފް ޕޮލިސް ޢަލީ ޝުޖާޢު މަގާމުން އިސްތިއުފާ ދެއްވައިފިއެވެ. 

ރައީސް އޮފީހުގެ އިސް ތަރުޖަމާނު ހީނާ ވަލީދު ދާދި ދެންމެ އަކު އެކްސްގައި ކުރެއްވި ޕޯސްޓެއްގައި ވަނީ، ކޮމިޝަނަރ އޮފް ޕޮލިސް ޢަލީ ޝުޖާޢު މަަޤާމުގެ އިސްތިޢުފާ ހުށައެޅުއްވުމާ ގުޅިގެން ރައީސުލްޖުމްހޫރިއްޔާ އިސްތިޢުފާ ޤަބޫލުފުޅު ކުރައްވައިފައުވާ ކަން ހާމަކުރައްވާފައެވެ. 

ސީޕީ ޝުޖާޢު އިސްތިއުފާ ދެއްވުމާއި ގުޅިގެން ކަމިޝަނަރ އޮފް ޕޮލިސްގެ މަސްއޫލިއްޔަތު ވަގުތީގޮތުން އަދާކުރައްވަން ޑެޕިއުޓީ ކަމިޝަނަރ އޮފް ޕޮލިސް ފަރުހާދު ފިކުރީ ވަނީ ކަނޑައަޅައިފައެވެ.

ކޮމިޝަނަރ އޮފް ޕޮލިސްގެ މަޤާމުން ޝުޖާއު އިސްތިއުފާ ދެއްވާފައިމިވަނީ، ހައްވާ ޔުމްނު ރަޝީދު (ޔުމްނު) ވެއްޓުނު މައްސަލާގައި ފުލުހުން ކުރަމުންްގެންދާ ތަހްޤީޤަށް އާއްމުންގެ ގިނަ ބައެއްގެ ފަރާތުން ފާޑުކިއުންތައް އަމާޒުވެފައިވަނިކޮށްކަން ފާހަގަކޮށްލެވެއެވެ.

އުމުރުން 21 އަހަރުގެ ޔުމްނު ވެއްޓުނުކަމަށް މައުލޫމާތު ލިބިފައިވަނީ އޭޕްރިލް 18 ވަނަ ދުވަހު ހ. މިޓާޒް ގޭގެ ފުރާޅު މައްޗަށެވެ.

ޔުމްނުގެ ހާދިސާ ތަހްޤީޤް ކުރުމަށް ފުލުހުން އިހުމާލުވަމުންދާކަމަށްބުނެ ބައެއް ފަރާތްތަކުގެ ފާޑިއުންތައް ފުލުހުންނަށް އަމާޒުވެފައިވާއިރު، އެކަމާ ގުޅިގެން މުޒާހަރާތަކެއްވެސް ވަނީ ފަށާފައެވެ. މި މުޒާހަރާގެ ތެރޭގައި ސީޕީ އިސްތިއުފާ ދިނުމަށް ގޮވާލާފައިވާއިރު، ޔުމްނުގެ ތަހްޤީޤުގައި ފުލުހުން ބައެއް ކަންކަން ސިއްރުކުރަމުންދާކަމަށްވެސް އެފަރާތްތަކުން ވަނީ ބުނެފައެވެ.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ކޮމިޝަނަރ އޮފް ޕޮލިސްކަމަށް ޝުޖާޢު އައްޔަނުކުރައްވާފައިވަނީ، 2023 ވަނަ އަހަރުގެ ޑިސެމްބަރުމަހުގެ 25 ވަނަ ދުވަހުއެވެ. އޭރު ޝުޖާޢު ހުންނެވީ، އެސިސްޓެންޓް ކޮމިޝަނަރ އޮފް ޕޮލިސްގެ މަޤާމުގައެވެ.