ޕޮލިސް ކޮމިޝަނަރަކަށް ހުންނެވި އަލީ ޝުޖާއު މަގާމުން އިސްތިއުފާދެއްވުމުން އެމަގާމަށް ޑެޕިއުޓީ ކޮމިޝަނަރަކަށް ހުންނެވި ފަރުހާދު ފިކުރީ ހަމަޖެއްސުމަށް ފަހު އެ ނިންމުން ބަދަލުކޮށްފި އެވެ.
ކޮމިޝަނަރު އޮފް ޕޮލިސް އަލީ ޝުޖާއު އެމަގާމުން މިރޭ ވަނީ އިސްތިއުފާއަށް ދެއްވާފަ އެވެ. ޝުޖާއުގެ އިސްތިއުފާ ރައީސް ވަނީ ގަބޫލު ކުރައްވާފަ އެވެ. އެކަން ރައީސް އޮފީހުގެ ތަރުޖަމާން ހިނާ ވަލީދު އާންމު ކުރެއްވުމުން ހޯމް މިނިސްޓަރު އަލީ އިހްސާން ވަނީ އެކްސްގައި ޕޯސްޓެއް ކުރައްވާފަ އެވެ.
ވިދާޅުވީ ޝުޖާއު މަގާމުން އިސްތިއުފާދެއްވުމުން އެމަގާމަށް ޑެޕިއުޓީ ކޮމިޝަނަރަކަށް ހުންނެވި ފަރުހާދު ފިކުރީ ހަމަޖައްސާފައިވާ ކަމަށެވެ. އެ ޕޯސްޓް ކުރެއްވީ މިރޭ 7:46 ގަ އެވެ. ނަމަވެސް އޭގެ ފަހުން އިތުރު ޕޯސްޓެއް ކުރެއްވި އެވެ.
އޭގެ އެއްގަޑިއިރު ފަހުން 8:46 ގައި ކުރެއްވި ޕޯސްޓްގައި ވިދާޅުވީ ފުލުހުންގެ މުއައްސަސާއިން މިވަގުތު އެއްމެ އިސްކަންދީގެން ކުރިއަށްގެންދާ މަސައްކަތަކީ މިހާރު ހިނގަމުންދާ ތަހުގީގުގެ މަސައްކަތް ކަމަށެވެ. އެއީ ގެއެއްގެ ނުވަވަނަ ބުރީން އަންހެނަކު ވެއްޓުނު ހާދިސާ އެވެ.
މި ތަހުގީގުގެ ކަންކަމާ އެންމެ އިސްކޮށް ހަވާލުވެ ހުންނެވީ ޑެޕިއުޓީ ކަމިޝަނަރު އިސްމާއިލް ނަވީން ކަމަށް ވާތީ ކަމިޝަނަރު އޮފް ޕޮލިސް ކަމަށް ބޭފުޅަކު އައްޔަން ކުރެވެންދެން އެ މަސްއޫލިއްޔަތު ވަގުތީގޮތުން އަދާކުރައްވަން ޑެޕިއުޓީ ކަމިޝަނަރު އިސްމާއިލް ނަވީން ކަނޑައަޅާފައިވާ ކަމަށެވެ.
ޝުޖާއުގެ އިސްތިއުފާއާއެކު ފުލުސް ހިންގުން ފިކުރީއާ ހަވާލުކުރުމަށް ފަހު އޭގެ އެއް ގަޑިއިރު ފަހުން އެ ނިންމުން ބަދަލު ކުރަން ޖެހުނު ސަބަބެއް މިނިސްޓަރު ވިދާޅެއް ނުވެ އެވެ. އެފަދަ ނިންމުމެއް ނިންމަން ޖެހުނީ ބަލަންވާވަރަށް ނުބަލާ އެކަން އިއުލާނު ކުރުމުންނެވެ.
އެކަމަށް ވަރަށް ބޮޑަށް ފާޑުކިޔުން އަމާޒުވާނެކަން އެނގިވަޑައިގަންނަވާތީ މިނިސްޓަރު އިހްސާން ޕޯސްޓް ކުރެއްވީވެސް އެ ޕޯސްޓަށް ކޮމެންޓް ނުުކުރެވޭ ގޮތް ހެދުމަށް ފަހު އެވެ. މިހާރު ވެސް އާންމުންގެ އެންމެ ފާޑުކިޔުން ބޮޑު މިނިސްޓަރު އިހްސާންގެ އެ ޕޯސްޓް ރި-ޕޯސްޓްކޮށް ވަރަށް ގިނަ ބަޔަކު ދަނީ ފާޑު ކިޔަމުންނެވެ.
Advertisement
This content is created and paid for by advertisers and does not involve Voice Journalists
