ބ.އަތޮޅު ސޮނޭވާފުށީގެ މުއައްޒަފުންތަކެއް، ނެލިވަރު ފިނޮޅަށް ޤަވާއިދާ ހިލާފަށްވަދެ އެ ސަރަހައްދުގައި އުސޫލްތަކާ ހިލާފަށް އަމަލުތައް ބެހެއްޓުމުން އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ) އިން، ސޮނެވާފުށި ރިސޯޓް 448,375 ރުފިޔާއިން ޖޫރިމަނާކޮށްފިއެވެ.

އީޕީއޭއިން ބުނީ މިދިޔަ އަހަރުގެ ޑިސެމްބަރުމަހުގެ 18 ވަނަ ދުވަހު ސޮނޭވާފުށީގެ މުއައްޒަފުންތަކެއް ފަތުރުވެރިންނާއެކު ބ.ނެލިވަރު ސަރަހައްދަށް ޤަވާއިދާ ހިލާފަށް ވަދެފައިވާކަމަށެވެ. ސޮނޭވާފުށީގެ މުއައްޒަފުން ނެލިވަރު ފަޅުތެރެއަށް ވަނުމަށްފަހު ޤަވާއިދާ ހިލާފް އަމަލުތަކެއް ކުރިއަށް ގެންގޮސްފައިވާކަމުގެ މައުލޫމާތު ލިބިގެން އީޕީއޭއިން ވަނީ އެ މައްސަލަ ބަލާފައެވެ. އީޕީއޭއިން ބުނީ މައްސަލަ ބެލުމުން ސޮނޭވާފުށީގެ މުއައްޒަފުން ފަތުރުވެރިން ގޮވައިގެން އެތަނަށް ވަދެފައިވަނީ، ބަޔޯސްފިއާ ރިޒާވް އޮފީހުގެ ފަރާތުން ހުއްދަ ނުހޯދާކަން އެނގޭކަމަށެވެ.  ސޮނޭވާފުށީ މުއައްޒަފުންނާއި ފަތުރުވެރިން ހިމެނޭހެން ޖުމްލަ 10 މީހަކު ވަނީ އެ ސަރަހައްދަށް އުސޫލާ ހިލާފަށް ވަދެފައެވެ. އެމީހުން އެ ސަރަހައްދަށް ވަދެފައިވަނީ އިރުއޮއްސި 6 ޖެހިފަހުންކަމަށް އީޕީއޭއިން ވަނީ ފާހަގަކޮށްފައެވެ.

ސޮނޭވާފުށީގެ މުއައްޒަފުން އެ ސަރަހައްދަށްގޮސް އެތަނުގައި ކުރުން މަނާ ކަންކަމުގެ ތެރޭގައި ހިމެނޭ، ރޭގަނޑު އަލިވާގޮތަށް އެ ސަރަހައްދު ދިއްލުމާއި، އެތަނުގެ ދިރުންތަކާއި އާދަކާދައަށް ބުރޫއަރާގޮތަށް އަޑުގަދަވާފަދައިން އަމަލުކުރުމާއި އަދި އަލިފާން ރޯކުރުމާއި އަލިފާން ގެންގުޅެފއިވާކަން އީޕީއޭއިން ވަނީ ފާހަގަކޮށްފައެވެ. ސޮނޭވާގެ މުއައްޒަފުން އެ ސަރަހައްދަށް ދިއުމުން ބަޔޯސްފިއާގެ މުއައްޒަފުން ވަނީ އެ ސަރަހައްދު ދޫކޮށްދިއުމަށް އެމީހުންގެ ކިބައިން އެދިފައެވެ. ނަމަވެސް އެގޮތަށް އަމަލުކޮށްފައި ނުވާކަމަށްވެސް އީޕީއޭއިން ވަނީ ބުނެފައެވެ.

އީޕީއޭއިން ބުނީ ސޮނޭވާފުށި ރިސޯޓް 448,375 ރުފިޔާއިން ޖޫރިމަނާކޮށްފައިވަނީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމުގެ ޤާނޫނުގެ ދަށުންކަމަށެވެ. އެ އިދާރާއިން ވަނީ، މިހިނގާ އޭޕްރިލްމަހުގެ 23 ވަނަ ދުވަހުން ފެށިގެން 30 ދުވަހުގެ ތެރޭގައި ޖޫރިމަނާ ފީ ދައްކައި ނިންމުމަށް ސޮނޭވާފުށި ރިސޯޓަށް އަންގާފައެވެ. 

ހިމާޔަތްކޮށްފައިވާ ސަރަހައްދުތަކަށް ވަދެގެން މީގެ ކުރިންވެސް އީޕީއޭއިން ބައެއް ފަރާތްތައް އެކި އަދަދުތަކުން ޖޫރިމަނާކޮށްފައިވާކަން ފާހަގަކޮށްލެވެއެވެ.