ހުޅުމާލެ ފޭސް 2 ގެ ފްލެޓެއްގައި އަންހެނަކު ހޭނެތިފައި އޮއްވާ ފެނުމާ ގުޅިގެން ތަޙުޤީޤު ފަށައިފިއެވެ. 

ފުލުހުން އެކްސް ގައި ކުރި ޕޯސްޓެއްގައި ބުނީ، މިއަދު ހެނދުނު 6:05 ހާއިރު ހުޅުމާލެ ފޭސް 2 ގައި ހުންނަ ވިނަރެސް ފްލެޓެއްގެ ތެރެއިން އަންހެނަކު ހަޅޭލަވަމުންދާ އަޑު އަޑު އިވޭ ކަމަށް ބުނެ ފުލުހުންނަށް ގުޅާފައިވާ ކަމަށެވެ. މި މައްސަލަ ރިޕޯޓް ކުރީ އާއިލާއިން ކަމަށްވެސް ބުންޏެވެ. 

އަދި، ފުލުހުން އެތަނަށް ގޮސް ބެލިއިރު 21 އަހަރުގެ ދިވެހި އަންހެނަކު ހޭނެތިފައި އޮއްވާ ފެނިފައިވާ ކަމަށާ އެ ވަގުތު އެ ފުލެޓް ތެރޭގައި އާއިލާގެ މެންބަރުން ތިބި ކަމަށްވެސް ބުންޏެވެ. ނަމަވެސް އަންހެން މީހާގެ ކޮޓަރީގައި އެހެން މީހަކު ނެތް ކަމަށް ބުންޏެވެ. 

ފުލުހުން އިތުރަށް ބުނެފައިވާ ގޮތުގައި ހޭނެތިފައި އޮތް އަންހެންމީހާ ވަގުތުން ހުޅުމާލެ ހޮސްޕިޓަލަށް ގެންގޮސް ދަނީ ފަރުވާ ދެމުންނެވެ.

އަދި މި ހާދިސާއާ ގުޅޭ ގޮތުން ތަޙުޤީޤެއް ފަށައިފައިވާ ކަމަށްވެސް ފުލުހުން ބުނެފައިވެއެވެ.

މި މައްސަލައިގައި އިތުރު ތަފްސީލެއް ފުލުހުން ހާމަކޮށްފައެއް ނުވެއެވެ.