ގދ. ގައްދޫއިން ހުޅުމާލެއަށް ދަތުރުކުރަމުންދަނިކޮށް ގެއްލުނު "ބްރިލިއަންޓް ކެރިއަރ" ނަމަކަށް ކިޔާ ދޯނި ފެނިއްޖެއެވެ.

އެ ދޯނި ފެނިފައިވަނީ ރޭ ފަތިހު 5:00 އެހައިކަންހާއިރު ލ. އަތޮޅު ތެރެއިން ކަމަށާ، ދޯނި އޮތީ އިންޖީނު ހުއްޓިފައި ކަމަށް ފުލުހުން ބުންޏެވެ.

އަދި ދޯންޏަށް ބޭނުންވާ އެހީތެރިކަން ފޯރުކޮށްދީފައުވާ ކަމަށާ ދޯނީގައި ތިބި އެންމެންގެ ހާލު ރަނގަޅު ކަމަށް ކޯސްޓް ގާޑާ ހަވާލާދީ ފުލުހުން ބުންޏެވެ. 

Advertisement

2025 އޭޕްރިލް 27 ވަނަ ދުވަހުގެ ރޭ 8:00 އެހައިކަންހާއިރު ގދ. ގައްދޫއިން ހުޅުމާލެއަށް ދަތުރުކުރި މި ދޯނީގައި ތިބީ 5 މީހުންނެވެ. އެއީ 3 ދިވެހިންނާއި 2 ބިދޭސީންނެވެ.

އެ ދޯނި ގެއްލެމުގެ ކުރިން ދޯންޏާ އެންމެ ފަހުން ގުޅިފައިވަނީ އޭޕްރިލް 27 ވަނަ ދުވަހުގެ ރޭ ދަންވަރު 2:40 ގައި ކަމަށާ، އެއިރު ކެޕްޓަން ވިދާޅުވެފައިވަނީ ހުވަދޫ ކަނޑަށް ނުކުތްތާ މާ ގިނަ އިރު ތަކެއް ނުވާ ކަމަށް މީގެ ކުރިން ފުލުހުން ބުންޏެވެ.

މި ދޯނި ގެއްލުނު މައްސަލަ އިއްޔެ ހަވީރު 6:00 ގައި ގައްދޫ ޕޮލިސް ސްޓޭޝަނަށް ރިޕޯޓުކުރެވި، އެމް.އެން.ޑީ.އެފްގެ ސަދަން ރީޖަން ކޮމާންޑަށް ވަނީ މައުލޫމާތު ދެވި، ދޯނި ހޯދަން އިއްޔެ ވަނީ ފަށާފައެެވެ.