ފްރާންސްގެ ދެކުނުގައި ހުންނަ ގާޑް ސަރަޙައްދުގެ ލަ ގްރޭންޑް ކޮމްބް މިސްކިތުގައި މުސްލިމަކަށް ވަޅިން ހަމަލާދީ ވަރަށް އަނިޔާވެރިކޮށް މަރާލައިފިއެވެ. މި ހާދިސާ ހިނގާފައިވަނީ ހުކުރު ދުވަހުއެވެ.

ހާދިސާގައި މަރުވެފައިވާ އަބޫބަކުރު ކިޔާ މީހާއަށް 40 ފަހަރަށްވުރެ ގިނައިން ވަޅިން ހަމަލާދީފައިވާކަމަށް ރިޕޯޓުތައް ބުނެއެވެ.

އޭނާއަށް ހަމަލާދިން ފަރާތުން ވަނީ އެ ހަމަލާ ދެމުން ވީޑިއޯ ކުރަމުން އިސްލާމްދީނަށް ފުރައްސާރަވެސް ކޮށްފައެވެ. 

Advertisement

މި ހާދިސާ ހިނގާފައިވަނީ އަބޫބަކުރު، އޭނާއަށް އެ ހަމަލާދިން ފަރާތަށް ނަމާދުކުރަން ދަސްކޮށްދެމުންދަނިކޮށެވެ. އެގޮތުން ހަމަލާދިން ފަރާތުން އިސްލާމްދީނަށް ވަންނަން ބޭނުންވާކަމަށް ދޮގުހަދައި، އޭނާއަށް ނަމާދުކުރަން ދަސްކޮށްދިނުމަށް އެދިފައިވާއިރު، އަބޫބަކުރު އޭނާއަށް ނަމާދުކުރަން ދަސްކޮށްދެމުން ސަޖިދައަށް ދިޔުމުން އެ ފަރާތުން ވަނީ އޭނާއަށް ވަޅިން ހަމަލާދީފައެވެ.

އަބޫބަކުރުގެ ހަށިގަނޑު ފެނިފައިވަނީ ހުކުރު ނަމާދަށް އެހެން މީހުން އައިސް މިސްކިތަށް ވަނުމުންނެވެ.

ހަމަލާދިން ފަރާތަކީ އޮލިވިއޭ އެޗް ކިޔާ ބޮސްނިއާގެ އަސްލަކަށް ނިސްބަތްވާ ފްރާންސްގެ ރައްޔިތެކެވެ. އޭނާއަކީ މުސްލިމެއް ނޫނެވެ. އިޓަލީގެ ޕިސްޓޯއިއާގައި ހުންނަ ފުލުސް މަރުކަޒަކަށް އޭނާ އަމިއްލައަށް ހާޒިރުވެފައިވާކަމަށް ގާޑް ސަރަޙައްދުގެ ޕްރޮސެކިއުޓަރ އަބްދުލްކަރީމް ގްރިނީ ވަނީ ހާމަކޮށްފައެވެ.

ހާދިސާއާއި ގުޅިގެން ފްރާންސްގެ ރައީސް އެމެނުއެލް މެކްރޯން އާދީއްތަ ދުވަހު އެކްސްގައި ލިޔުއްވި ޕޯސްޓެއްގައި ވަނީ އެކަން ކުށްވެރިކޮށްފައެވެ.

"ނަސްލީ ތަފާތުކުރުމާއި ދީނުގެ މައްޗަށް ބިނާކޮށް ކުރެވޭ ނަފްރަތަށް ފްރާންސްގައި ޖާގައެއް ނޯންނާނެ. އެއްވެސް ބަޔަކު އަޅުކަން ކުރުމުގެ މިނިވަންކަމަށް އުނިކަމެއް ގެނެވިގެން ނުވާނެ،" ފްރާންސްގެ ރައީސް ވިދާޅުވިއެވެ.