ކުރީގެ އިމިގްރޭޝަން ކޮންޓްރޯލަރ މުހައްމަދު ޝަމްއާން ވަހީދު ބަންދުގައި ބެހެއްޓުމަށް ކުރިމިނަލް ކޯޓުން ކޮށްފައިވާ އަމުރަށް ހައިކޯޓުން މިއަދު ތާއީދުކޮށްފިއެވެ.

ކޮރަޕްޝަންގެ ތުހުމަތުކޮށް މޯލްޑިވްސް އިމިގްރޭޝަންގެ ކޮންޓްރޯލަރުކަމުން ވަކިކުރި މުހައްމަދު ޝަމްއާން ވަހީދު ހައްޔަރުކޮށް، އޭނާގެ ބަންދުކުރި މައްސަލައިގައި އޭނާގެ ފަރާތުން ހައިކޯޓަށް ހުށަހެޅި އިސްތިއުނާފް އެކޯޓުން ބަލައިގަނެފައިވަނީ މިހިނގާ އޭޕްރިލްމަހުގެ 9 ވަނަ ދުވަހުއެވެ.

އިސްތިއުނާފްގެ މައްސަލަ މިއަދު ހައިކޯޓުގައި ކުރިއަށްގެންގޮސްފައިވާއިރު، އެ ކޯޓުގެ 3 ފަނޑިޔާރުންގެ އިއްތިފާގުން ނިންމާފައިވަނީ، ޝައްމާނުގެ ބަންދަށްޖެހި 15 ދުވަހާއި، ޝަރީއަތް ނިމެންދެން ބަންދުކުރުމަށް ނެރުނު އަމުރުވެސް ރަނގަޅުކަމަށެވެ.

Advertisement

ހައިކޯޓަށް ހުށަހެޅި އިސްތިއުނާފުގެ މި މައްސަލާގައި ޝަމްއާންގެ މައްޗަށް ހިންގާ ތަހުގީގުގައި އޭސީސީގެ ދައުރެއް ނެތުމާއި އެ މައްސަލަ ފުލުހުންގެ މުއައްސަސާއިން އެކަނި ތަހުގީގު ކުރުމަކީ ޖިނާއީ އިޖުރާތާ ހިލާފު ކަމެއްކަން ފާހަގަކޮށް އެ މައްސަލަ ބަލައި ބަންދުގެ މުއްދަތު ރިވިއު މުރާޖައާކުރުމަށް އޭނާ ވަނީ އެދިފައެވެ. ނަމަވެސް ހައިކޯޓުން ވަނީ އެކަމަކީ ޤާނޫނާ ހިލާފްކަމެއް ނޫންކަމަށް ފާހަގަކޮށްފައެވެ. އެގޮތުން ފުލުހުންނަށް ތަހްގީގްކުރެވޭނޭކަމަށް ހައިކޯޓުގެ ހުކުމްގައި ވަނީ ބުނެފައެވެ.

ބިދޭސީން އަތުން ނާޖައިޒު މަންފާ ހޯދުމުގެ ތުހުމަތުގައި ޝަމްއާން ހައްޔަރު ކުރީގެ މާރިޗު މަހުގެ 21 ވަނަ ދުވަހުގެ ރޭގެ ވަގުތެއްގަ އެވެ. ޝަމްއާންގެ ބަންދާމެދު ގޮތް ނިންމަން ކޯޓަށް ހާޒިރު ކުރުމުން 15 ދުވަހުގެ ބަންދުގެ މުއްދަތެއް ޖަހާފައިވަނީ ހުސްވި މާޗްމަހުގެ 22 ވަނަ ދުވަހުއެވެ. 

ޝައްމާންގެ މައްސަލާގައި ފުލުހުން ވަނީ އޭނާ ދިރިއުޅުނު އެޕާޓްމަންޓުވެސް ބަލާފާސްކޮށްފައެވެ. އެގޮތުން އޭނާ ދިރިއުޅުނު ތަނުން 257،475 ރުފިޔާ އާއި 10،000 ޑޮލަރު ފެނުނު ކަމަަށް ފުލުހުން ވަނީ ބުނެފައެވެ.