މޯލްޑިވްސް ޕެންޝަން އެޑްމިނިސްޓްރޭޝަން އޮފީހުގެ ބޯޑުގެ ޗެއަރޕަރސަންގެ ދައުރު ހަމަވާތީވެ، ކުރިއަށްއޮތް ދައުރަށް ޗެއަރޕަރސަނެއް ހޯދުމަށް އިއުލާނުކޮށްފިއެވެ.

މިކަމާ ގުޅޭގޮތުން ޕެންޝަން އޮފީހުން ބުނީ، ޕެންޝަން އޮފީހުގެ ބޯޑުގެ ޗެއަރޕަރސަންގެ ދައުރު އަންނަ ޖޫންމަހުގެ 19 ވަނަ ދުވަހުގެ ނިޔަލަށް ހަމަވާނޭ ކަމަށެވެ. އެ އޮފީހުން ބުނީ ޗެއަރޕަރސަން ހޮވުމުގެ ކަންކަން ކުރިއަށްގެންދިއުމަށް ޤާނޫނުގައި ވާގޮތުގެ މަތީން އެކުލަވާލެވޭ ސިލެކްޝަން ކޮމިޓީން މި މަޤާމަށް ކުރިމަތިލައްވާ ފަރާތްތަކުގެ ތެރެއިން 3 ނަން ޝޯޓްލިސްޓް ކުރެއްވުމަށްފަހު، ކެޕިޓަލް މާރކެޓް ޑިވަލޮޕްމަންޓް އޮތޯރިޓީން އެ ފަރާތްތަކުގެ ޝަރުޠު ހަމަވާކަން ޔަޤީންކުރެވޭނޭ ކަމަށެވެ.

ޕެންޝަން އޮފީހުގެ ޗެއަރޕަރސަން ކަމުގެ މަގާމުގެ ޝަރުތުތަކުގެ ތެރޭގައި ވިޔަފާރި، އިޤްތިޞާދީ ނުވަތަ ޤާނޫނީ ރޮނގުން ފުރަތަމަ ޑިގްރީ ފެންވަރަށް ތަޢުލީމު ހާސިލުކޮށްގެން ހުރި މީހަކަށް ވާންޖެހެއެވެ. މީގެ އިތުރު ޕެންޝަން ނުވަތަ އިންވެސްޓްމަންޓްގެ ދާއިރާގައި މަސައްކަތުގެ ތަޖުރިބާވެސް ހުންނަން ޖެހެެވެ.

ޕެންޝަން އޮފީހުގެ ބޯޑުގެ ޗެއަރޕަރސަންކަމުގެ މަޤާމަކީ ރައީސުލްޖުމްހޫރިިއްޔާ އައްޔަނުކުރައްވާ މަޤާމެކެވެ. ޕެންޝަން އޮފީހުގެ ޗެއަރޕަރސަންކަމުގެ މަޤާމުގައި މިހާރު ހުންނެވީ، ރައީސް ނަޝީދުގެ ސަރުކާރުގައި ފިނޭންސް މިނިސްޓަރަކަށް ހުންނެވި ޑރ.އަހުމަދު އިނާޒްއެވެ. ޕެންޝަން އޮފީހުގެ ޗެއަރޕަރސަންގެ މަޤާމަށް ޑރ.އިނާޒް އައްޔަނުކުރެއްވީ 2022 ވަނަ އަހަރުގެ ޖޫންމަހުއެވެ. ޑރ.އިނާޒް މަތީ ތައުލީމް ހާސިލްކުރެއްވީ އިކޮނޮމިކްސްގެ އެކި ދާއިރާތަކުންނެވެ.