އޭޕްރިލް 18 ވަނަ ދުވަހު ހ. މިޓާޒް ގޭގެ ފުރާޅު މައްޗަށް ވެއްޓި އަނިޔާވި، ހައްވާ ޔުމްނު ރަޝީދުގެ ބޮޑު އޮޕަރޭޝަނެއް ކާމިޔާބު ކަމާއެކު ކޮށްފި އެވެ.

ޔުމްނު ފުރާޅު މައްޗަށް ވެއްޓިފައި އޮއްވާ ފެނުނު ހާދިސާއަށް ހަފްތާއެއް ވެފައިވާއިރު، އޭނާ ހޮސްޕިޓަލަށް ގެންގޮސް އެންމެ ކުރިން ފަރުވާ ދީފައިވަނީ ވެންޓިލޭޓަރުގައެވެ. ނަމަވެސް ހާލަތު ކުޑަކޮށް ރަނގަޅުވެ ވެންޓިލޭޓަރުން ނެގި އެވެ. ފަހުން ފަރުވާ ދިނީ އައިސީޔޫގަ އެވެ.

އަދި އިތުރު ފަރުވާއަށް އޭނާ ވަނީ މެލޭޝިޔާއަށް ފުރުވާލާފަ އެވެ.

Advertisement

އޭނާގެ އާއިލާ އިން ބުނީ މެންދުރު ތިނެއް ޖެހިއިރު ޔުމްނު ސާޖަރީއަށް ވައްދާފައިވާ ކަމަށެވެ. އޭނާގެ ކަނދުރާއާ ދިމާލުން މައިބަދައިގެ ސީ-7 ކަށިގަނޑުގައި ރެނދެއް ލާފައިވާ ކަމަށާ މިއަދުގެ ސާޖަރީއަކީ އެކަމާއި ގުޅިގެން ކުރި ސާޖަރީއެއް ކަމަަށެވެ.

އެއީ އޭނާ ކުރަން ޖެހޭ އެންމެ މުހިންމު ސާޖަރީ ކަމަށް އާއިލާ އިން ބުނެ އެވެ.

ސާޖަރީގެ ކަންކަން ދިޔައީ ރަނގަޅަށް ކަމަށާ ހުރިހާ ކަމެއް ރަނގަޅަށް ގޮސްފިނަމަ ވަރަށް އަވަހަށް ޔުމްނުއަށް އިށީނދެ އިނދެވޭ ވަރުވާނެ ކަމަށް ވެސް އާައިލާ އިން ބުނެ އެވެ.

ޔުމްނުއަށް ފަރުވާ ކުރުމަށް 800،000 ވުރެ ގިނަ ފައިސާ ހަރަދުވާނެ ކަމަށް އޮތީ ބެލެވިފަ އެވެ. ދައުލަތުން ވަނީ އެންސްޕާ މެދުވެރިކޮށް 25،000 ޑޮލަރު ހަމަޖައްސާފަ އެވެ.

އަދި އާންމުންގެ އެހީތެރިކަން ހޯދަން ކުރިއަށް ގެންދިޔަ ހަރަކާތްތަކުން 700،000 ވުރެ ގިނަ ފައިސާ ވަނީ ހޯދާފަ އެވެ. އާއިލާ އިން ބުނާ ގޮތުން އާންމުންގެ އެހީއަށް އެދުނީ ދައުލަތުން އެ މިންވަރަށް ފައިސާ ނުލިބުމުންނެވެ.