ތިން މުޒާހަރާ، އެންފޯސްމަންޓް ޓީމްތައް މާލޭގެ އެކި ސަރަހައްދު ތަކުގައި ހަރަކާތްތެރިވަނީ
ދިވެހި ފުލުހުންގެ ޚިދުމަތުގެ އެންފޯސްމަންޓް ޓީމްތައް މާލޭގެ އެކި ސަރަހައްދު ތަކުގައި ހަރަކާތްތެރިވަމުންދާ ކަމަށް އެ ޚިދުމަތުން މިރޭ ބުނެފި އެވެ.
ފުލުހުޖް އެކަން ހާމަކުރީ ސޯޝަލް މީޑިއާގައި މިރޭ އާންމު ކުރި ޕޯސްޓެއްގަ އެވެ. އެ ޕޯސްޓްގައި ފުލުހުންގެ ޓީމުތައް ހަރަކާތްތެރިވާ ފޮޓޯތަކެއް ހިމަނާފައިވެ އެވެ.
އަދި ބުނީ ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް އެންފޯސްމަންޓް ޓީމް ތައް މާލޭގެ އެކި ސަރަހައްދު ތަކުގައި ހަރަކާތްތެރިވަމުންދާ ކަމަށެވެ.
މި މަގުން ކުރެވޭ މަސައްކަތުން ރައްކާތެރިކަމުގެ އިހުސާސް ރައްޔިތުންނަށް ކުރެވުން އެއީ ފުލުހުންގެ މަސައްކަތުގެ އަމާޒު ކަމަށް ވެސް ވަނީ ބުނެފަ އެވެ.
ފުލުހުން މަގުމަތީ ހަރަކާތްތެރި ވަނީ -- ފޮޓޯ: ޕޮލިސް
ރައްޔިތުންގެ ރައްކާތެރިކަން ކަށަވަރު ކުރުމަށް ފުލުހުން ދަނީ ގިނަގުނަ މަސައްކަތްތަކެއް ކުރަމުންނެވެ. އަދި ރައްޔިތުންގެ އިތުބާރު ހޯދުމަށް ވެސް ގިނަ މަސައްކަތްތަކެއް ދިޔައީ ކުރަމުންނެވެ.
ނަމަވެސް މިދިޔަ މަހުގެ 18 ވަނަ ދުވަހު އަންހެނަކު ގެއެއްގެ ފުރާޅުމައްޗަށް ވެއްޓުނު ހާދިސާއާ ގުޅިގެން ފުލުހުން އަމަލު ކުރިގޮތުން އިތުބާރަށް ވަނީ ބުރޫއަރާފަ އެވެ.
ސިލްސިލާ މުޒާހަރާތަކެއް، ސީޕީ އިސްތިއުފާ
އެ ހާދިސާއާ ގުޅިގެން މާލޭގައި ސިލްސިލާ މުޒާހަރާތަކެއް ދަނީ ކުރަމުންނެވެ.
ޒުވާނުންގެ ބަޔަކު އެއްވެ ކުރިއަށް ގެންދާ މި މުޒާހަރާތަައް ކޮންމެ ރެއަކު ވެސް މަޖީދީމަގުގައި އޮވެ އެވެ. މަގުގެ ބޮޑުބައެއް ބަންދުކޮށްގެން އަދި މަގުމަތީ އިށީންދެ ތިބެ ކުރިއަށް ގެންދާ މުޒާހަރާގައި އެ މީހުންގެ ޑިމާންޑްތައް ދަނީ ހާމަ ކުރަމުންނެވެ.
ފުލުހުންނަށް ތުހުމަތު ބޮޑުވެ މުޒާހަރާގެ އަޑު ގަދަވެފައި ވަނިކޮށް ސީޕީގެ މަގާމުގައި ހުންނެވި އަލީ ޝުޖާއު ވަނީ އިސްތިއުފާ ދެއްވާފަ އެވެ.
މި މުޒާހަރާގެ އިތުރުން ކުރީގެ ކޮންޓްރޯލާ ޝަމްއާން މިނިވަން ކުރުމަށް ގޮވާލާ ވެސް ބަޔަކު ދަނީ މުޒާހަރާ ކުރަމުންނެވެ. އަދި ވާނުވާ ބަންދުގައި ތިބި މީހުން ދޫކޮށްލަން ގޮވާލާ ވެސް މިރޭ ވަނީ މުޒާހަރާ ކޮށްފަ އެވެ.
Advertisement
This content is created and paid for by advertisers and does not involve Voice Journalists
